Ángela Pumariega

La xixonesa compite en vela nes clases Elliot 6m y 470. Compitiendo dende los 10 años, ganando un campeonatu d'España en 2001. Diez años dempués, en 2011, consiguió un gran ésitu al aportar a campeona d'Europa nel primer campeonatu entamáu pola ISAF. Xusto al añu siguiente, llogró faese col oru olímpicu en Londres.

Samuel «Samu» Sánchez

El ciclista d'Uviéu tien una trayectoria envidiable nun deporte tan especial pa los asturianos como ye'l del ciclismu. Debutó como profesional nel añu 2000 y anque nun consiguió nenguna victoria sí que destacó a pesar de la so mocedá, llegando a puestos destacaos magar de tener un añu complicáu por una mancadura de rodía. Ensin dulda el so mayor ésitu tuvo nos Xuegos Olímpicos de Pequín en 2008, onde llogró l'oru na modalidá de Ruta. Uviéu tien una estatua que recuerda esi momentu.

María Ángeles «Masa» Rodríguez

María Ángeles Rodríguez, conocida pol nomatu de «Masa» foi parte d'una hestórica selección femenina d'h.oquei. La selección trabayó duramente mientres un añu pa preparase pa los xuegos olímpicos. L'equipu convivió y preparóse tantu física como mentalmente de formes innovadores entós daquella. Teníen claro'l so oxetivu de llegar al máximu nuna competición na que, anque empezaron dubioses, fueron de menos a más llegando a ganar l'oru nos xuegos olímpicos de Barcelona 92, ente les que taba la xixonesa.

Pedro Pidal

El marqués de Villaviciosa foi'l primera medallista olímpicu asturianu de la hestoria. Concretamente en París 1900, los segundos de la era moderna y los primeros en celebrase lloñe de Grecia. Unos xuegos olímpicos que daquella nun taben entá profesionalizaos y teníen un espíritu más «amateur». Ello ye que esti home participó de casualidá, yá que s'atopaba nesi momentu visitando París pa otros asuntos distintos. Pedro Pidal participó na modalidá de «tiru al pichón» (yeren otros tiempos…), na que quedó segundu. Los cambeos en riegles, espíritos y la poca importancia qu'entós se -y daba a la competición fai que baillen los datos (¿medaya de plata, de bronce, medaya de plata que val oru, descalificáu más de cien años dempués…?), y ye qu'en 2004 estes olimpiaes sufrieron dellos cambeos al ser revisaes.