Si dalgo sabemos bien ye qu’Asturies ye máxica. Los sos paisaxes cautivadores, ablucantes y cuasi de ficción. Y eso nun lo vemos namás nós, si non munchos cineastes en tol mundu. Y ye qu’Asturies foi escenariu de dalgunes películes bien prestoses. Güei nos vamos mencionate cuatro qu’igual nun conoces.

Vicky, Cristina, Barcelona

Ye de sobra conocío que Woody Allen se namoró d’Asturies namás llegó. Y eso acabó de demostralo en Vicky Cristina Barcelona, pa la que rodó delles escenes n’Avilés y Uviéu. Na película, Vicky y Cristina conocen a Juan Antonio nunes vacaciones en Barcelona. Esti mozu, amablemente, ofréce-yos dir a pasar un par de díes n’Uviéu. Y asina, podemos ver les típiques escenes woodyallenisques onde'l paisaxe tien cuasi tanta importancia como’l diálogu. Los paseos per Asturies, imitando a Manhatan en tantes películes que tenemos vistes d’él, ye un prestor ablucante. Quiciabes la película perse nun ye precisamente la meyor del mundu, pero ver Asturies dende los güeyos de Woody Allen ye una esperiencia que paga bien la pena pa los expertos en fotografía nel cine.

Carne de gallina

Carne de gallina foi una película de 2002 escrita por Javier Maqua y el guionista Maxi Rodríguez (guionista, por ciertu, de la bien conocida 7 Vidas). La película rodóse nel conceyu de Mieres, y cuenta la hestoria de la familia Quirós, que trata d’ocultar la muerte del so güelu ya qu'ensin la so pensión nun tienen nengún sustentu. Una crítica a la situación de la minería n’Asturies enllena d’humor negru y que como curiosidá ye la película que más presente tien l'asturianu de les de la nuesa llista. Y esto ye porque, según contó Maxi Rodríguez nuna entrevista, quería reflexar tamién la realidá llingüística que se vive n’Asturies. Y anque ye verdá que n’ocasiones el acentu de los actores tira casi pa lo galego, la intención ye lo que cuenta. Y ver a actores como Anabel Alonso o Kerra Elejalde falar n’asturianu presta. Respetose tanto la llingua, que en dalgunes sales fuera d’Asturies, les conversaciones n'asturianu sotituláronse en castellán.

Para qué sirve un oso

Maxi Rodríguez nun foi l’únicu guionista asturianu que tuvo en 7 Vidas. Ehí tamién coincidió col uvieín Tom Fernández. Tom fixo amistá colos dos protagonistes de la serie: Gonzalo de Castro y Javier Cámara. Con ellos trabayó en delles películes y proyectos dempués. Podríemos falar d’unes cuantes (probablemente la meyor y más conocía seya La torre de Suso), pero güei vamos recomendar una un pocu menos conocida: Para qué sirve un oso. Una película que s'estrenó en 2011 y que se rodó nel Camín Real de la Mesa, cerca de la sienda’l osu. Cuenta la hestoria d’Alejandro, un zoólogu que vive en metá’l monte esperando la llegada de los osos y evitar la so extinción y la del planeta, y el so hermanu Guillermo ,un biólogu que tamién llucha contra’l calentamientu global, pero que perdió la fe y piensa que ye yá bien tarde pal planeta. Asturies resulta l’escenariu perfectu pa contar una hestoria na que la naturaleza ye la protagonista, presentándonos dos personaxes tan diferentes pero iguales y la importancia de curiar el nuesu entornu. Amás de contar cola siempres agradecida collaboración de Geraldine Chaplin, que ta espléndida nel papel de lloca protectora.

Pídele cuentas al rey

Pídele cuentes al rey ye una película de 1999 escrita y dirixida por José Antonio Quirós. Ye una “road movie” na que vemos a Fidel, un mineru asturianu que, fartu de la situación precaria que viven los mineros (de los que vemos d’una forma bastante fiel y cruel que tienen de vivir nel primer actu de la película), decide dir caminando dende Asturies hasta Madrid pa vese col rei. Como bona “road movie”, lo más interesante nun ye namás la pareya protagonista a la que siguimos, sinon los personaxes qu’atopen nel camín. Destacando la familia portuguesa que-yos copia la idea y cola que guarden un pique bien simpáticu y un caméu xenial de Santiago Segura, que daquella nun yera tan conocíu como anguaño. Nós como asturianos quedámonos cola crudeza cola que describe la preocupación de los mineros y la so familia, les revoluciones siempres hestóriques de los mineros, con cantar de Santa Bárbara incluyíu y una banda sonora n’asturianu de la Asturiana Mining Company: «La trova del minero».