Cadavéu ye, quiciabes, un pueblu que se foi dando a conocer sobremanera nos últimos años, cola puesta en valor de la so mayor fiesta, La Regalina, pero tamién por ser el llugar onde nació y vivió l'escritor Fernán Coronas, el padre Galo a finales del sieglu XIX y empiezos del pasáu sieglu. Por eso y por más, convidámosvos a visitalo.
Cadavéu ye unu de los más antiguos pueblos del conceyu, asitiándose equí'l medieval puertu balleneru de Vallenerán. Ente les sos cais contrasten les pequenes cases, con güertu y horru, colos vistosos xalés d'indianos, como Villa Hilda, o los ximielgos de los Pérez. Pero ye qu'amás, Cadavéu foi declaráu pueblu más guapu d'Asturies en 1954, siendo bien evidente los méritos que motivaron el otorgamiento de tal galardón.
Un prestosu paséu va conducinos al llamáu Puexu de la Talaya, tamién conocíu como Campu de la Garita. Ellí, colgada sobro los abruptos cantiles y la sablera de La Riberona, metanes una panorámica de suañu, ta la pequena ermita qu'alluga la bien venerada imaxe de la Virxe de la Riegla –La Regalina-, en que'l so honor se celebra una estraordinaria fiesta'l domingu últimu d'agostu; fiesta d'orixe medieval recuperada pol poeta, historiador, arqueólogu, llingüista y folclorista local Galo Fernández, quien roblaba les sos obres col nome de Fernán Corones, y que la so casa foi rehabilitada p'allugar una biblioteca con obres n'asturianu y en castellán y un taller de indumentaria tradicional.
