Bien mozu, a los cincuenta años, finó Carlos Tartiere. Fízolo en Xixón, dempués de consagrar tola so vida al deporte y a la ciudá d'Uviéu, onde apostó pola fusión de los sos dos clubes futbolísticos

Si güei honramos a Carlos Tartiere como'l impulsor que foi de non poques disciplines deportives n'Asturies y como fundador y presidente del Real Uviéu foi por un suañu: el de la dinamita. Con ella tamién se puede, n'efectu, suañar como lo fixo, nel postrer terciu del sieglu XIX, el so padre, el bilbaín (y de raigaños franceses) José Tartiere Lenegre. Inxenieru d'oficiu, la saga de los Tartiere, na so caña paterna, empecipió cola so figura allegándose a la rexón pa crear pólvora na so propia sociedá, “Santa Bárbara”. Carlos sedría'l so fíu menor y, col tiempu, el más conocíu nos círculos deportivos rexonales a pesar d'una curtia vida qu’acabó un 31 de xunetu de 1950, na finca de Somió (Xixón) onde braniaba, y a los cincuenta años, dos menos de los que tenía'l so padre José cuando él ñació.

Si José foi l'emprendedor, el so fíu Carlos sedría dende la so mocedá'l ‘sportman’. Y de qué manera: cuenta, por exemplu, La Voz d'Asturies en xunu de 1924 que «en luxosu automóvil llegaron a la Industrial Asturiana de Moreda los mozos ‘sportmans’ don José y don Carlos Tartiere, fíos del opulento home financieru Escelentísimu señor Conde de Santa Bárbara de Llugones (…) Apenes abandonáu l'auto, toos ellos montaron en briosos caballos qu'al efeuto-yos teníen preparaos, encaminándose a visitar los criadorios de hulla que nel Cotu denomináu ‘Cabramoza’ esplota en términos de Agüeria la yá mentada empresa». Destacáu tirador en competiciones de tiru de pichón, Tartiere tamién casó con Maruja Díaz Villamil al añu siguiente y, al que siguió, fixo hestoria: apostó pola unión del Stadium Club de Oviedo y el Real Club Deportivu de Oviedo que daría llugar, en 1926, al Real Oviedo CF.

«Sigo considerando la unión como'l fin de la problema qu'enllancó la vida deportiva n'Uviéu»», dixo, a entrugues del diariu ‘Rexón’, en marzu d'esi añu. «Pol bien d’Uvieu, pola prosperidá del mio queríu Uvieu, sería capaz de tolos sacrificios que fixeren falta». Y asina foi: a los pocos díes d'aquella entrevista, constituyóse, con Tartiere al frente como presidente, el club de fútbol al que consagró lo que-y quedaba de vida, ensin dexar, por ello, el tiru al pichón. Fai agora setenta y un años, morrió Tartiere y collo llegó la conmoción. «Cientos de llamaes telefóniques y de telegrames de condolencia recibíos nel llar doliente en tola tarde y nueche d'ayeri dieron yá, en principiu, la midida del dolor que la desapaición de tan pernomáu fíu espertó en tolos ámbitos de la provincia, que pierde con él un prototipu d'home bonu, intelixente y cordial», dixo EL COMERCIO al dar la luctuosa noticia. Tóo un personaxe.