L’otru día compartí una semeya onde se ve una pieza que correspuende col ornamentu que se pon nes picalines d’horros y paneres, y que lleven nomes como cantapaxarinos, moñu, cantu’l páxaru, obispu, xeixu, etc.
Suelen ser de piedra o cerámica y tienen una forma piramidal, troncocónica, con forma de pirula, ya que conlleva un simbolismu de fertilidá y protección, nalgunes ocasiones ye una llosa, una xarra, una veleta, etc.., y hailos bien curiosos. Punxe una esbilla nesti álbum.
Ello ye, que’l que punxe, ye una pieza de cerámica que tá nuna panera de Bernueces, en Xixón. Esta pieza fízose nel vieyu alfar de Faro, nos alredores d’Uviéu. Esti alfar, sigue vivu gracies José Vega Gutiérrez, Selito, fiyu de Lito, que ya morriere, artesanos colos que coincidí na década de los ochenta nun memorable viaxe a Zürich pa tocar ellí col grupu LLiberdón.
Otra xente nuevo, como Orlando , trabaya nesti terrén ya nun solo como artesán, sinon como investigador de la hestoria y l’arquioloxía, ya que la cerámica ye casi qu’un adn de los pueblos y cultures. Dende esti alfar salieron miles de pieces, algunes ganadores de concursos estatales, y ente elles tán les famoses páxares.
o estes otres pieces que vemos, los gallos o pites “botijo” botiyuuna clase de pieces que se conservaron nel gustu tradicional de varios llugares, y que n’Asturies ya veis qu’acabaron en riba de les paneres. Amás d’esta, conozo otra que tien dos pites de Faro, y que se ve na carretera vieya de Xixón a Siero pel Muncó, a l’altura’l camín per onde se sube pa Caldones. Tamién hai una na cumal de la casona del alfar de Faro. Igual hai más perehí.
El casu ye que les dos que pongo tán en paneres que paecen de fechura moderna y del mesmu artesanu o taller, que, por dalgún motivu, remátales pieces de Faro. Ya puestos, a ver si soi/somos a sacar de qué taller son les paneres. Per otru llau una pieza de Faro siempre queda bien nuna casa ¿Eh ho?, nun digo más y dígolo too.
Esiste un catálogu de l’Alfafería tradicional de Faro entituláu “Del Trapadoriu a la páxara”, editáu pola Asociación d’Amigos de l’Alfarería de Faro, con testos de Toño Huerta, y onde tamién se recueyen algunes frases y cantares venceyaos a los alfares qu’había na zona, como estos:
Existe un catálogo de la Alfarería Tradicional de Faro titulado «Del Tapadoriu a la páxara», editado por la Asociación d’Amigos de l’Alfarería de Farom, con textos de Toño Huerta, y donde También se recogen algunas frases y cantares relacionados con los alfares que había en la zona, como estos:
«Voi mandate facer de nuevo en Faro» (que se diz cuando una persona nun acaba d’alicar d’una malura).
“-¿Qué lleves, muyer de Faro?
-Nada, …si caigo.”
“En llegando a la Temprana
ya sé que voi pa Faro,
la mayor pena que llevo
que non sé mayar el barro.”
“Soi de Faro, soi de Faro
y ye mio madre una faruca,
y por eso siempre traigo
la barriguina fartuca.”
