María del Socorro Tellado López (de guah.e llamábenla “Socorrín”, d'ende vien lo de “Corín”) nació'l 25 d'abril de 1927 n'El Porto, un pueblu del conceyu asturianu El Franco. De padre maquinista naval y de madre ama de casa, foi la única muyer de los cinco fíos que tuvieron.

En 1939 mudóse cola so familia a Cádiz. Dende ellí aficiónóse a la llectura de conocíos escritores como Miguel Delibes, Alejandro Dumas, Balzac y noveles erótiques. Tamién entama los sos estudios en Psicoloxía anque nun llega a terminalos. En 1948 torna a la so localidá natal, El Porto, y trés años dempués instálase en Xixón onde permanecería hasta la so muerte en 2009. Magar el so delicáu estáu de salú, Corín Tellado siguió escribiendo hasta'l final anque yá nun yera ella quien escribía sinón la so nuera, a quien-y dictaba los sos relatos pa la revista Variedaes.

Publicó la so primer novela en 1946. A partir d'esi momentu, Corín Tellado foi autora d'unos 4.000 títulos. Vendió más de 400 millones d'exemplares de les sos noveles y foi traducida a más de venti llingües. Mientres una vida dedicada a la escritura, l'autora asturiana llogró una estensa obra de noveles romántiques, principalmente hasta noveles erótiques sol pseudónimu Ada Miller. Figura nel Llibru Guiness de los Récords de 1994 (edición española) como la más vendida en llingua castellana.

Mario Vargas Llosa destacó de Corín: «La vasta producción de Corín Tellado va quedar como muestra d'un fenómenu sociocultural». Nun se puede por tanto, duldar del fenómenu social que supunxo Corín Tellado y la so repercusión mundial, más allá de les dómines y cultures nes que viven los sos llectores.

L'ésitu d'esta escritora trespasóse a la gran pantalla cuando en 1990 dexó los derechos de 26 de les sos noveles a productores qu'emitieron capítulos basaos nelles. En 1998 el Conceyu de Xixón decidió poner el so nome a una cai de la ciudá. Quepe destacar tamién que Corín Tellado sofitó la oficialidá del asturianu.

Corín Tellado tresformó lo cotidiano nuna gran aventura en busca del amor, faciendo que los sos protagonistes esperimentaren too una axuntadura d'emociones y situaciones de celos, temor y amistá. Les trames yeren conmovedores, desgarraores, pasionales... sintiéndose los millones de llectores identificaos colos protagonistes.