Cristina Fernández-González del Valle, más conocida pol so nome artísticu Cristina del Valle, nació’l uno d’agostu de 1960 n’Uviéu. Yá dende moza, destacó pol so llabor social y colaborativu. Esos valores xunto cola so actitú activista, lleváronla a estudiar criminoloxía en Madrid en 1980. Dende ehí collaboró con ONG como Ayora, Solidaria o Apram ensin dexar de llau un activismu social pol pueblu saharaui, los derechos humanos, o sobre too, escontra la violencia de xéneru, contra la que tien un papel activu demientres tola so vida. A finales de los años 80, debuta en solitariu col nome artísticu de “Cris”, lanzando dos discos: el primeru col mesmu nome, y el segundu nomáu “Siempre te metes en líos”. Durante esta etapa destacó col agora escaecíu “Te lo has hecho fatal” una adaptación de “Fallait pas commencer” de la cantante belga Lio.

Sicasí, la so vida artística y sentimental diba dar un xiru bien grande el 17 de xunu de 1989, cuando conoció en Vigo al cantante Alberto Comesaña nuna gala en TVG. Con él entamó una relación sentimental que resultó na fundación del grupu “Amistades peligrosas” un añu dempués. Xuntos sacaron el so primer álbum nel añu 1991: “Relatos de una intriga”. La xunión ente Cristina y Alberto resultó nun grupu transgresor, libreal, sexual y políticamente comprometido (esto último, sobre too na so última época). L’ésitu foi pergrande, resultando en miles de discos vendíos, y conciertos multitudinarios.

Too esto cambió nel añu 1997 cola ruptura sentimental de Cristina y Alberto que, anque siguieron profesionalmente xuntos, esto duró namás qu’un añu. En 1998, separáronse definitivamente tamién como grupu tres una xira con más de 60 actuaciones.

Cristina siguió cantando, pero amás siguió comprometida coles causes poles que cree. En 1999 fundó la plataforma Mujeres Artistas contra la Violencia de Género, y solicitó durante años la promulgación d’una llei integral contra la violencia de xéneru, que finalmente terminó aplicándose nel añu 2004. Anguaño, sigue siendo una muyer comprometida con delles causes sociales.

Como curiosidá, el pasáu avientu de 2020, decidió “facer les paces” con Alberto Comeseña y llanzar un discu recopilatoriu nel que celebren los 30 años de “Amistades Peligrosas”, xunto con un cenciellu inéditu nomáu “Alto al fuego”. Nesti nuevu cantar, Cristina cuenta que canten “al amor y a la empatía como antídotu ante la desesperanza y el dolor de nun tener feches les coses bien”, un mensaxe qu’encaxa a la perfección cola situación social que vivimos anguaño.