David Blanka (Llangréu, 1985) ye actor, llocutor y productor con una amplia esperiencia en teatru, televisión y cine. Formáu na Escuela Pro Arte de Xixón, Llaboratoriu William Layton de Madrid y Actor’s Temple de Londres, completó los sos estudios col Cirque Du Soleil na disciplina de clown con Mookie Cornish y en contact con Patricia Roldán. Amás estudió doblaxe de la mano de Fernando Quiciabes. Participó en distintos talleres y seminarios de cámara ya interpretación cinematográfica impartíos por profesionales como Alfonso Vallina o Montxo Armendariz. www.davidblanka.com

Un llugar pa perdese una fin de selmana… Diríate que cualquier pueblu d’Asturies y acompañau pola xente más cercana.

Un llugar pa vivir… Mi pueblu: Llangréu. Pola xente, pola cercanía a les ciudaes grandes d’Asturies y porque a pesar de toles coses y de como les cuenques mineres van morriendo, nun perdemos el sarcasmu y esi humor tan nuesu.

Un platu… Ye dificil quedase con un, tengo varios: les fabes, pote asturianu, fabes con almejes…

Un postre… El arroz con lleche que me fae mi má que comolu a cantidaes industriales.

Una playa pa pasar el día… La playa de Mexota o la de Rodiles, ambes pelos recuerdos que traenme de cuando yera guaje.

Un pueblín que nun podemos dexar de ver… Caliao en Casu. Tamién préstame abondu Soto de Agues nel conceyu de Sobrescobiu.

Un chigre pa tomar unos culinos… El Hoyu l’agua en Llanes y si yes de los que prestate fartate, ye d’estos chigres que merez la pena visitar.

Un parque natural pa visitar… El parque natural de Redes. Aunque cualquiera d’Asturies merez la pena. Somos unos privilexiaos nesi sentíu.

Una fiesta a la que nun faltar… A mi la folixa préstame asgaya, asina que puéu decivos varies: los nabos de Sotrondio, El Carmín de la Pola, San Timoteo en L.luarca, los carnavales de Lluanco y Santiago en Sama de Llangréu.

Un muséu pa recomendar… Muséu de la minería d’Asturies y el Muséu de los quesos pa los que somos unos fartones.

Un momentu de la hestoria d’Asturies que te prestaría vivir… La oficialidá de la llingua y ver al Uviéu ganando la lliga o al Unión Popular de Llangréu compitiendo colos grandes del fútbol. Casi diríate que ye más realista lo de la oficialidá, pero miéu dame que dese primeru l’otru.

Un baille pa pasalo bien… Yo pude ser un baillarín de la virxen sin nun llega ser polos pies torcíos. La verdá que nun soi muncho de baillar pero si tengo que escoyer un, la media vuelta.

Una pallabra n’asturianu que te preste… tengo munches pero per acotar diríate que caxigalines, guaje y oyisti. Voi ganame el mote a pulsu porque tengoles tol dí na boca.

Una tradición que nun pue perdese… El Anguleru o les fogueres de San Xuan. La primera polos neños y les neñes y la segunda porque la nueche de San Xuan tien algo especial.

Una espresión n’asturianu que te preste… «Gatu escaldau, nun vuelve al fornu»