Foi una de les mayores traxedies que se recuerden na mar asturiana, pero, inesplicablemente, son bien escasos los documentos que faen referencia a ella. La traxedia de Candás, tres la que casi un centenar d'homes nun volvieron a tierra, transita na actualidá ente la lleenda y l'imaxinariu de les xentes de mar, venceyada tamién, per mediu d'una de les sos víctimes paraleles, a otra de les realidaes de la hestoria social asturiana por escelencia: la emigración a Ultramar. Asocedió fai agora 181 años.

Una galerna devastadora

Esto ye: cuando nun había periódicos que lu cuntaren nin medios de comunicación qu'a tou puntu llegaren a los más llonxanos llugares d'Asturies. Entá y asina, ye difícil entender l'ausencia de documentos al redol d’una traxedia que superó con muncho a la anterior: l'ocho de xineru de 1782, cincuenta y siete pescadores desapaecieron mientres faenaben a la pesca del besugu. Un sucesu tiñíu de dellos toques de milagru, yá que, al andar los díes, acabaron apaeciendo en tierra, con vida, quince d'ellos, patrón incluyíu. Fueren rescataos pola balandra Santa Cristina, embarcación “del nuesu Católicu Monarca Carlos III”. En 1840 fueron siquier tras decenes más los homes que desapaicieron ente les fríes agües del Cantábricu, y pola mesma causa: una galerna a la qu'antecedió una fuerte nevarada. Pero que nun dexó rastru documental.

Quien meyor lo estudió foi'l yá fallecíu David Pérez-Sierra, hestoriador local que rastreó hasta la última páxina de los llibros parroquiales pa dar con información dalguna d'aquel accidente. Y háila, polo qu'atopó: una anotación del párrocu candasín faciendo referencia a una galerna “na que solo se salvaron cuatro [barcos] casi milagrosamente, ensin qu'hubiera nel espaciu de tanto tiempo, la más pequena noticia del paradoriu de los 80 o 90 homes que morrieron nes cinco llanches restantes, como tien de suponese a lo menos con certidume moral”. Fueron, por tanto, nueve lanchones, con capacidá pa portar 150 homes, los que sufrieron les inclemencies del tiempu; cuatro tornaron, pero cinco nunca nun llegaron a volver. Y la mar solo devolvió a tierra trés cuerpos: los d’Amaro Alonso, José Prendes Pumeda y Hermógenes Velasco. 

Ente 75 y 90 homes nun volvieron a casa aquella nueche.

Ente la traxedia, la fortuna

Anque solo conocemos el nome de los trés que pudieron enterrase en tierra firmes, fueron munches les viudes que quedaron d'aquel naufraxu. Cúntase, por tradición oral, que gran númberu d'elles fueron almitíes solidariamente pa trabayar na recién Real Fábrica de Tabacos de Xixón (antiguu conventu, desamortizáu nos tiempos de Mendizábal, tresformárase en Tabacalera diba trés años, en 1837), siendo tantes, y con tantos neños, que mientres un tiempu Cimadevilla calificóse como “un barriu de Candás”. Ellí, en Carreño, quedaríase la viuda de Hermógenes Velasco, otra de les víctimes, con un neñu de meses nos brazos.

El mesmu que traxo la fortuna a tanta traxedia. Genaro Velasco aportaría a ser un prohome bien conocíu na villa candasina, pero con non poco esfuerzu pa conseguilo. Años dempués de la traxedia que-y dexó güérfanu, siendo entá adolescente, embarcó hacia L'Habana nun barcu nel que se-y inscribió como “sirviente”. Aportó a munchu más. Velasco fixo fortuna en Cuba, llegando a fundar la so propia marca de cigarros habanos (empezó como trabayador en “La Madama”, otra tabacalera, un negociu llamáu a ser paralelu a aquella tráxica nueche nel Cantábricu) y ensin escaecer nunca los sos llazos con Asturies. Equí, en Candás, el “güérfanu pródigu” fundó una fábrica escabechera nel so barriu natal, Santaolaya, y en 1895 consiguió'l permisu municipal pa convertir la so humilde casa familiar nel 13 de la Cai La Cuesta nun palaciu nel que nunca nun llegó a vivir y que güei, más de cien años dempués de la muerte ensin descendencia del indianu, ocupa, dende 1994, la Casa Consistorial.

Morrió antes de poder faelo, en Cuba, en 1909. El so entierru, cola calabre tresportada en barcu de L'Habana a Santander; en tren de Santander a Xixón y dellí a Candás en xarré, foi unu de los más concurríos que se recuerden. Quiciabes pa poder compensar el silenciu atronador que quedara encuayáo na memoria del pueblu la traxedia que lu marcó a él y a tantos güérfanos.