Xixón nun cuenta con un muséu específicamente pensáu como pinacoteca municipal que permita amosar la obra artística en propiedá del Conceyu de Xixón, que supera les 4.000 pieces. Esti ye un problema vieyu del conceyu y ye por ello que s’utilizaba’l Vieyu Institutu Xovellanos como espacio espositivo y desde el 6 d'agostu de 1971, va güei 50 años, cola restauración de la casa de la familia Xove-Llanos, vien usándo esti edificiu de Cimavilla.

Con too, l’edificiu paez quedar curtiu p’amosar l’amplia colección d’arte xixonesa. El proyectu de futuru pasa por ocupar l’antigua fábrica de tábacos, enantes conventu, asitiada pocos metros más arriba nel mesmu barriu. Esti espaciu paez que podrá da-y la visibilidá merecida a esta bayurosa colección y al mesmu tiempu garantizar un espaciu suficiente pa que la vida de Gaspar y Xosefa Xovellanos, asina como otres figures d’esta familia, tengan nel edificiu más que les dos sales actuales dedicaes a ellos.

Nel edificu actual atopamos una colección de cuadros y escultures dende’l sieglu XVIII al sieglu XX, con obres d’artistes asturianos como Mariano Ramón Sánchez, Ventura Álvarez Sala, Evaristo Valle o Juan Botas, por facer un percorríu de nomes que pase pelos trés sieglos representaos nel muséu.

Especial protagonismu tien la obra escultórica de José Mª Navascuesautor que ta consideráu “de vital importancia pa la revitalización cultural na Asturies artística de les décades sesenta y setenta, siendo güei consideráu como unu de los artistes más singulares del panorama español de la segunda metá del sieglu XX”icasí, a min, como xixonés, préstame destacar el Retablu del Mar de Sebastián Miranda, espuestu na última planta, cuasi nel desván, del edificiu. Una obra de llargu tiempu de realización, dende 1929 a 1971, que tien pa los xixoneses una especial relevanvia, pues recueye a figures reales tallaes en madera con enorme realismu, espeyando la sociedá playa de la primer metá del sieglu XX, con personaxes identificaos.

Una obra qu’amás fala de la hestoria d’Asturies. La obra orixinal, realizada n'escayola policromada nel añu 1931, destrúise mientres un bombardéu del bandu franquista na guerra civil, qu'afectó al estudiu que l'artista tenía en Madrid. El relieve en madera que s'espón anguaño ye una versión realizada por Sebastián Miranda en 1971, a partir de fragmentos de los moldes orixinales que pudieron recuperase. La calidá de la primer versión puede apreciase al traviés d'una copia n'escayola que'l mesmu artista realizó y que s'espón na mesma sala.

L'artista, anque ñacíu n'Uviéu, caltenía una estrecha vinculación con Xixón, onde vivía la so hermana, y especialmente col barriu de pescadores al qu'allegaba con frecuencia y onde instaló un estudiu por que los personaxes qu'apaecen nel Retablu posaren pa él. Pudieron identificar a munchos d'ellos: Pilar Vega «La Malvaloca», «La Peñes Pardes», Montes «L’anarquista», «El Prin», Concha «La Guapa», María «La Monroya», «Pimpón cafetinos«, y un llargu etcétera que constitúi una maraviyosa semeya de los personaxes qu'ocupaben el barriu de Cimavilla y que-y conferíen el so particular idiosincrasia.

Toos estos conteníos faen que’l Muséu de la Casa Natal de Xovellanos seya un espaciu bien interesante pa visitar, non namás pal turista, sinón especialmente pa los asturianos y xixoneses, que pueden atopase con una parte importante de la so hestoria, especialmente nesti añu nel que'l Muséu fai mediu sieglu.