La Sierra del Cuera, ye una de les sierres costeres d'Asturies que sobresalen pola so magnitú y guapura.
Asturies caracterizóse siempres por regalanos los paisaxes de montes más formosos que daquién se pudiera imaxinar. Bastante ye que, montañistes, fotógrafos o, simplemente, xente qu'esfruta de la naturaleza polo xeneral, vien de tol mundu pa vivir en primer persona de la tranquilidá natural que tresmiten. La Sierra del Cuera ye un claru exemplu d'un d'estos montes de suañu.
La sierra del Cuera abarca distintos conceyos: Llanes, Cabrales, Peñamellera Alta, Peñamellera Baxa y Ribedeva. Ta asitiada de forma paralela al Mar Cantábricu, siendo un puntu de referencia pa los navegantes. Tien una estensión aprosimada de 30 kilómetros de llargor. Una de les sos cotes máximes atopense nel Picu Turbina, qu'algama 1.315 metros d'altitú. El Turbina atópase esactamente nel conceyu de Peñamellera Alta, onde tán los sos accesos más fáciles, pero tamién puede aportase dende otros conceyos.
Pa poder llegar a la cima y esfrutar del paisaxe, encamiéntase salir dende Alles y siguir una ruta que puede durar unes 4 hores. Pel camín, pueden atopase distintes cabañes o fontes que suelen ser propiedá de persones de la zona dedicaes al llendo. Amás tamién s'encamienta allegar con persones especializaes o guíes si'l día ta borrinosu o con borrina, yá que puede ser fácil desorientarse ente los distintos caminos.
Una vegada nel Picu Turbina, pueden vese escontra'l sur los Picos d'Europa, especialmente'l Macizu Central y la sierra de Portudera. Al norte, ta'l Mar Cantábricu y la mariña llanisca, y a los llaos, la Llosa de Viango o'l Picu Liñu.
Otra de les coses de les que puede esfrutase nesti llugar, ye de la posibilidá de ver delles aves rapazos, especialmente buitres leonados, alimoches o águiles de distintes clases y tamién, mamíferos como corzos, xabalíes, foinos ya inclusive llobos o perros amontesaos.
