El profesor alemán dexó constancia del so pelegrinaxe de 1980 nuna obra inédita, presentada pola so fía al gallardón de la Universidá d’Uviéu y la Fundación Valdés-Salas

El Premiu "Alfonsu II. Los diarios del Camín de Santiagu", convocáu pola Universidá d'Uviéu y la Fundación Valdés-Salas, concedióse na so tercer edición al alemán Herbert Simon, a títulu póstumu, poles impresiones qu'escribió sobre'l so pelegrinaxe de 1980. El diariu inéditu del profesor, que foi presentáu al premiu pola so fía, Lioba Simon Schuhmacher, contribuyó naquellos años al espardimientu européu d'esti itinerariu cultural que, va cuarenta años, nun yera tan conocíu como lo ye anguaño. Ello ye que la so esperiencia tuvo ecu na prensa europea. 

Herbert Simon, que moraba en Colonia y tenía 59 años, percorrió 368 quilómetros a lo llargo de nueve díes. La edición de la so obra per parte del Serviciu de Publicaciones de la Universidá va permitir conocer los detalles d'aquella esperiencia.

El xuráu tuvo compuestu por Leopoldo Tolivar Alas, caderalgu de Drechu Alministrativu de la Universidá d'Uviéu (presidente); María Álvarez Fernández, directora d'Área d'Estensión Universitaria (secretaria); Cristina González Morán, directora xeneral d'Universidá del Principáu d'Asturies; Francisco Martín Miguel, director de la Casa de les Llingües de la Universidá d'Uviéu; Laureano Víctor García Díez, presidente de l'Asociación Asturgalaica del interior (Camín de Santiagu); y Melchor Fernández Díaz (diariu La Nueva España).

Con estos gallardones caltiense viva la memoria d'Alfonsu II, rei asturianu y primer pelegrín a Santiagu siguiendo la ruta primitiva dende Uviéu, que, por ello, tien el calter de fundacional.