Tolos años miles de neños escriben con munchu ciñu una montonera de cartes qu’han llegar a los Reis Magos, onde s’alcuentren tolos regalos polos que nagüen, pero tamién los que quixeran que-yos trayesen al so pá y a la so ma, amás d’otros familiares. Sicasí, xeneralmente, cuando van entregar la carta tan importante ven qu’ellos, los Reis Magos, nun son quienes la recueyen, sinon qu’hai una persona asemeyada a ellos nel so llugar. Alcuéntrense con que, un paxe unviáu polos mesmos monarques, ye l’encargáu d’alministrar toes eses cartes llenes d’ilusión de los más pequeños, de sentir les propuestes que-y llancen los neños y de regala-yos dalguna llambionada enantes de que marchen cola so familia. Esti paxe, que ye sobre manera conocíu n’Asturies, tien por nome Aliatar y ye un príncipe col encargu de ser el Carteru Real de los Reis Magos.

Ibrahim Aliatar yera un noble guerreru del reinu nazarí de Granada y llegó a ser caudillu d’estos territorios. El valor qu’esti home tenía na batalla foi recompensao pol rey del momentu, Boabdil, y fizo casoriu cola so fía, Morayma, de la que llevaba bien de tiempu namoráu. Esti fechu fizo que se convirtiera nel Príncipe Aliatar, el nome pol qu’anguaño ye reconocíu. Muertu nel campu de batalla, na guerra de Loja, esti guerreru recuérdase na hestoria nazarí con gran ciñu, tanto poles sos fazañes como pola bona rellación que caltenía col rei Boabdil, convirtiéndose nun héroe llocal.

El so trabayu como mensaxeru del reinu yera motivu enforma pa convertilu nel personaxe perfectu y facer d’emisariu pa recoyer les cartes de los neños y tresllada-yles a los Reis Magos y, anque’l so principal ámbitu d’apaición ye, lóxicamente, nes zones andalusíes como Granada o Loja, ente otres, n’Asturies tamién tien un papel bien importante nes cabalgates que se celebren cada cinco de xineru.