La banda asturiana de fusión La Tarrancha entra a grabar un senciellu col nome de “Tiempu de sidra y roses”. La Tarrancha, sacaba'l so quintu y últimu discu, “Baillando con llokes”, n'avientu del 2018, xusto col cambéu l’añu . Dende entós p’acá namás pasaren pel estudiu a grabar dos cantares para dos compilatorios; "Vaya Sociedá!" pal compilatoriu “El mio cantar” con lletres d'escolinos asturianos, y “Llara echó moza” pal discu “Engarradiella” de los colectivos Non Name Kitchen y Bujarra Asturies.
“Tiempu de sidra y roses”, sigue'l camín de la fusión del so autodenomináu “mecigayu ska”, nesti casu entemeciendo soníos punk con aires folk d'equí y de allá, o de nenyures. La Tarrancha, vuelve poner el so trabayu en manos de Tutu Estudios y va cuntar con una collaboración para esti tema, la de Nico Braña a la mandolina. Nico Braña, precisamente acaba grabar nos mesmos estudios el segundu trabayu discográficu con Voodoo Grass, banda de la que forma parte al banjo, la mandolina y la guitarra. La idea de la banda ye grabar un video musical y publicar tanto'l vidio, como'l senciellu, simultáneamente en distintes plataformes dixitales d'equí a la primavera.
De cara a esta primavera y branu, la banda entá nun empecipió la so promoción de contratación, y anque yá ye un pocu tarde, tienen yá delles feches zarraes dientro y fuera d'Asturies. En nada, vamos tener información de dalguna d'elles, pero dende yá, anuncien que tienen abierta la so axenda y los sos teléfonos.
