Esti añu les propuestes de los finalistes presentáronse virtualmente nuna Gala que volvió celebrase coincidiendo col Día Internacional de la Muyer y la Neña na ciencia, y que se retresmitió en directu dende les oficines centrales de Bayer n'España.

Un añu más Bayer celebró la gala final de Cuestión de ciencia 2.0: ¿te atreves a desafiar el futuro?, una iniciativa puesta en marcha en collaboración con Big Van Ciencia y el sofitu de Parc Científic de Barcelona y Save the Children, coles mires de retar a la mocedá española a dar respuesta a dalgunos de los mayores desafíos globales en materia de salú, alimentación y sostenibilidá, d'una forma distendida y distinta, y con un claru focu social n'anguaño.

Nesta segunda edición, Estela Ferreira, alumna del IES Víctor García de la Concha de Villaviciosa, foi galardonada col primer premiu gracies a Yo desperdicio tú desperdicias él desperdicia, el so monólogu sobre l'amenorgamientu de desperdicios. Como galardón, Estela y el so centru van recibir una dotación de 3.500 euros que se van destinar a la meyora del equipamientu tecnolóxico y dixital y que, d'esta forma, van poder esfrutar tolos alumnos del IES Víctor García de la Concha. El monólogu de Estela foi escoyíu ente les más de 100 respuestes recibíes y foi presentáu güei al pie de los otros 11 finalistes, coincidiendo col Día Internacional de la Muyer y la Neña na Ciencia, nun eventu virtual que se retresmitió dende les oficines centrales de Bayer n'España.

Xuntu al trabayu d'Estela, tamién fueron galardonaes Jennifer Esteysi Holguín Reynoso, del IES Gómez Moreno de Madrid col so monólogu Vacuna sí, pero tú primero y Leyre Fernández, del Institut XXV Olimpíada de Barcelona, col testu Imprime e impresiona, col 2º (2.000 euros) y el 3º premiu (1.500 euros) respectivamente.

La responsabilidá de selección estos trés ganadores recayó sobro un xuráu espertu formáu por Eduardo Sáenz de Cabezón, divulgador matemáticu y presentador de Órbita Laika; José Miguel Mulet, divulgador científicu y bioquímicu; Rosa Porcel, divulgadora científica y bióloga; Carmen Guerrero, coordinadora de proyectos de cultura científica del CSIC; Esther Sarsa, miembru del patronatu de BCorp Spain y Responsable d'Alcuerdos estratéxicos para Teach For All; Margarida Mas, delegada territorial de ANIS en Cataluña; Elisenda Vallina, redactora xefa d'Economía de La Vanguardia; Marta Díez Alonso, de la área de Protección de la Infancia de Save the Children, y Irene Rodríguez, estudiante de biotecnoloxía de la UPV y escoyida de la iniciativa Youth Ag Summit 2019 de Bayer.