La buelga de la contienda bélica que se presenció n' Asturies a mediaos del sieglu pasáu sigue, anguaño, presente na nuesa tierra. Los restos de la guerra civil entá pueden vese, agora dende una perspectiva arqueolóxica y cultural. Pa ello, convidámosvos a conocer el Frente del Nalón al altor de Candamu, ún de los frentes más activos n'Asturies mientres el trescursu de la guerra.
El percorríu pa conocer la buelga de la batalla allárgase hasta 14 kilómetros. Sicasí, son trés trayectos siguíos nos qu'unu puede detenese y recular al empiezu nel momentu en que quiera.
Trayectu 1
Trátase d'un percorríu circular de 5 kilómetros qu'arranca y remata nel aparcamientu del Altu de la Sierra. Nesta ruta, vas poder atopar el blocáu centinela de Los Cuetos, la primer de les posiciones fortificaes. Tamién vas visitar la trinchera de La Llinar y una gran trinchera escavada na roca nel Pie de la Sierra.
Trayecto 2
Consiste nun percorríu de 3,5 kilómetros que ta fuera del monte y trescurre per una pista de los molinos eólicos. Equí vas poder ver les trincheres y atrincheramientos, observatorios, les bateríes d'artillería y les casamates. Ye la ruta que contien los elementos menos espectaculares, sacante la batería, que s'atopa nel Altu de los Cañones.
Trayecto 3
Trátase d'una ruta de 4,5 kilómetros y quiciás seya'l percorríu más espectacular. Empieza nel área recreativa de La Degollada nel que vas poder ver un llaberintu de trincheres nel que'l primer elementu significativu qu'atopamos ye un pozu pa un ñeru d'ametralladores que nun se llegó a acabar. Darréu, el puestu de fusileros y el primeru de los ñeros d'ametralladores de la Cima del Pedroso van ser los siguientes elementos de la ruta. Estes posiciones van repartise a lo llargo del percorríu hasta llegar al pueblu de Villar.
