La sablera de La Franca ye una sablera asitiada en Colombres (Ribadeva), nes proximidaes de la localidá del mesmu nome. Ta asitiada na desaguada del río Cabra y marca la llende costera ente esti conceyu y el de Llanes.

Esta preciosa sablera de forma triangular del oriente asturianu ta compuesta por sable finu, confinada polos altos cantiles de Santiuste y de la rasa de Pimiangu, que cayen sobro ella precipitadamente. Ta asitiada, amás, nuna redolada semiurbano, lo qu'ayuda a que la sablera tenga múltiples servicios turísticos. Como interés, nel S. XIX La Franca cuenta con un balneariu marítimu costeado por indianos que volvíen más ricos n'emigrando a América. Y ye que si por dalgo ye conocíu Colombres, la parroquia onde podemos atopar esa sablera, ye pola so tradición indiana.

Cúntase que mientres la Edá Media, los mercaderes desembarcaben nesta sablera asitiada ente los puertos de Llanes y San Vicente de la Barquera, yá que nestos dos puertos teníen que pagar impuestos y desembarcando equí evitávenlos.

El paisaxe de La Franca considérase paisaxe protexíu dende'l puntu de vista medioambiental, integráu nel paisaxe Protexíu de la Mariña Oriental asturiana. El so impactu medioambiental nun termina ende, yá que nella podemos acolumbrar aves que s'atopen anguaño nel catálogu d'especies amenaciaes.

Frente a La Franca podemos ver la isla del Castrón de Santiuste, un abelugu de gaviluetes y zona de práctica de bucéu. Conecta con otres cales como L'Osu, El Viveru y Regorneru.