Güei 31 d'ochobre nun sedrán poques les voces que se vayan sentise diciendo que les celebraciones del “Halloween” (la nueche d’ánimes de tola vida) ye una cosa mui d’americanos y que nun tien sentíu que se celebre equí. Sicasí, poco imaxina esta xente que la nueche d’ánimes tien unes raíces muncho más asturianes que californianes.

L’orixe d’esta fiesta ye concretamente celta. Y ye que viend qu’acababa el buen tiempo y llegaba’l duru iviernu, les tribus recoyíen les sos coseches pa que nun se perdiere, guardando too pa que pudiera dura-yos nel tiempu na que la tierra nun fuera fértil. Los celtes interpretaben el fin del buen tiempu y de la fertilidá de la tierra como’l fin del añu celta, y pensaben que la última nueche del añu, cuando l’añu morría, los muertos levantávense de les sos tumbes caminando pelos poblaos. D’equí salen leyendes bien conocíes como la de la santa compaña’n Galiza o la güestia n’Asturies, que diba peles viesques y los pueblos glayando "Andai de día que la nueche ye mía”. Estes almes en pena, que servíen de guía a los muertos más recientes, nun suponíen un peligru pa los vivos, pero si éstos los atopaben y los tocaben sufriríen el mesmu destín. Ye por esto que pa que los espíritus confunderen a los vivos colos muertos y nun s’ensañeren con ellos, yera costume n’aquella nueche antroxase de pantasma. Tamién yera costume cenar nes tumbes de los familiares o dexar un calderu d’agua o un pan a la entrada de los cementerios.

N’Asturies tuvieren celebrándose estes costumes hasta entamos del sieglu XX, cola dictadura de Franco, que desanició dafechu toles costumes paganes y-yos dio un sentíu más cristianu, por eso munchos años en vez de la nueche d’animes celébrase la nueche de los difuntos con mises y rezos a los que yá nun tán.

Al otru llau del charcu, los irlandeses, tamién d’orixe cerca, protagonizaren una emigración masiva a los Estaos Xuníos por mor de la Potato Famine a metá del sieglu XIX. Ehí siguieren celebrando toles sos costumes, incluyendo la del día enantes de tolos santos (All Hallows Eve) que caló na sociedá americana.

Col fin de la dictadura y la llegada masiva de medios de comunicación estaoxunidenses (sobretou series y películes), munchos sintiéronse atraíos por estes costumes tan festives, ignorando el so verdaderu orixe. Anguaño son delles les asociaciones y agrupaciones que lleven yá dellos años recuperando les raíces d’esto tan poco americano, anque mos quieran convencer de lo contrario, y tan celta como ye la nueche de les ánimes.