El Ramu Nadal ye ún de los adornos navidiegos asturianos más antiguos, con un orixe bien llonxanu, datáu dende enantes de la llegada del cristianismu, y equivalente al árbol de Nadal que se suel poner nes cases nos meses d’avientu y xineru. Esti oxetu ta formáu por una cadarma de madera triangular na que s’alluguen 12 veles (simbolizando los meses del añu) Amás, d’esta cadarma tamién se cuelguen ofrendes, como rosquielles o frutes, y dellos elementos ornamentales, como bordaos o filos de llana, ente otros.

Esta tradición, antaño bien estendida per Asturies y Llión principalmente, foi perdiendo puxu col pasu del tiempu por ser un elementu paganu, anque fuere asimilao pola Ilesia dempués de ver que nun yeren quien a prohibilo. Sicasí, anguaño l’usu d’esti adornu nes feches navidiegues va garrando mayor presencia, polo que podemos ver como esta tradición, cuasi desaniciada, ta recuperándose y estendiéndose a zones onde nun yera mui común atopar esti tipu de xeres.

Nel casu d’Asturies, alcontrámonos dende va yá tiempu delles actividaes al rodiu de les antigües tradiciones navidiegues asturianes, onde nun puede faltar el Ramu Nadal o’l Nataliegu, y que sirven pa esparder la cultura asturiana. Un bon exemplu d’ello ye la espublización de llibros rellacionaos cola navidá tradicional n’Asturies, como ye’l casu d’Un nataliegu perbullindiegu, de Víctor Pintado, 'Vitu' y Alberto Álvarez Peña y asoleyáu por Ediciones Trabe nel añu 2017. Esta obra, dirixida a los neños, avérase a la tradición de manera didáctica al traviés d’un cuentu ilustráu. Nun ye la única manera na qu’atopamos l’intentu de recuperación; vemos tamién como sobre too nes escueles apaecen delles actividaes, onde creen el so propio Ramu, que dempués van esponer nes zones comunes o edificios del conceyu, como ya fixo’l C.P. Palacio Valdés nel añu 2019. Pero tamién dende los Conceyos hai propuestes p’averar esta tradición a la reciella, con talleres como’l fechu en Grau pa que caún de los neños y neñes que vaigan, lleve ún d’estos adornos pa casa, onde poder esfrutar d’él.