Conocida como «la revista de lliteratura mui moza», Formientu naz en Xixón n'ochobre de 2006 y mientres los sos 15 años de trayectoria salieron a la lluz 18 ediciones qu'empezaron siendo semestrales, pasando a salir a la lluz una edición per añu col pasu de los años.
Esto nun foi lo único qu'evolucionó mientres la so trayectoria, foi fundada por Inaciu Galán y Bexa Pérez coles mires de promover la continuidá de la lliteratura n'asturianu y dar visibilidá a los escritores nuevos que son parte d'ello, afaciendo cada entrega a los enclinos lliterarios que se siguen nel momentu de la publicación. Amás, nun ye solo lliteratura, en cada númberu apaecen imaxes ya ilustraciones de distintos profesionales asturianos cola cuenta de da-yos más visibilidá al traviés d'esti mediu.
Tal ye la so capacidá d'adaptación, que'l pasáu añu mientres el confinamientu domiciliariu por motivos de la crisis sanitaria, sacaron adelantre la edición #FormientuEnCasaFest, un festival que consiguió atropar más de 100.000 visualizaciones coles 62 actividaes entamaes, ente les que destacaron los conciertos y les charres. Con tollo, consiguieron sacar alantre xuno de los festivales más llargos y completos de tolos realizaos mientres el confinamientu n'Europa.
Gracies a esta esperiencia amontóse la presencia lliteraria nes redes sociales y Formientu enciende'l motor pa impulsar una plataforma lliteraria y de cultura na rede. Esperemos que se caltenga presente nel mundu de la lliteratura, a lo menos, otros 15 años más.
