Recibía el nome de la so procedencia nos astilleros xixoneses, y la so fin supuso una de les mayores traxedies navales d’aquellos tiempos: tal día como güei, pero de 1884, naufragó en agües gallegues el ‘Gijón’ dempués de chocar escontra l’inglés ‘Lexham’. Hebo 116 muertos.

Entá sigue teniendo Oscar Olavarría una cai en Xixón con sabor a mar: la que sigue dende la subida de la Colexiata, yá en Cimavilla, dende la Plaza del Marqués. Nun pudiera haber meyor sitiu pa honrar a un navieru que fizo hestoria na ciudá, siendo como foi tamién ún de los fundadores de El COMERCIO, y pal que nun foi un buen día -nun mos cabe dulda- el 21 de xunetu de 1884

Y eso que el ‘Gijón’ ya nun yera d’él. Pero cuento, queridos llectores, que pa un bon navieru un bon barcu sigue siendo de só pa tola vida, anque tome rumbos distintos. Non en vano el ‘Gijón’, impresionante barcu correu con capacidá pa ochocientos pasaxeros y 100 miembros de la tripulación, 88,52 metros de eslora, 10,99 de manga y 7,60 de puntal, nomábase col nome de la ciudá na cual tamién posara el so granín d’arena pa la Historia Óscar Olavarría. Anque mercáu tiempo atrás pola empresa d’Antonio López, el barcu recibió esi nome por la so procedencia, y nel xunetu de 1884 taba destináu a viaxar de A Coruña a La Habana portando nel so interior farina, carbón, 114 pasaxeros y 80 tripulantes, asina como gran númberu de botes salvavides.

Pero nunca nun llegó. Esi día, el 21 de xunetu de 1884, na Costa da Morte gallega, nel cabo Vilán, colisionó escontra un mercante inglés, ‘Lexham’, no que va sentise como ún de los peores accidentes navales de la dómina, porque los muertos lleguen a ser 116, y tal impautu produxo que cambió dellos planes y execuciones de lo que diba ser nunos años el faru d’Hercules. Quixo l’infortuniu qu’aquel día reinara la neblina sobre la mar Cantábrica y que el ‘Lexham’, poco avezáu a agues braves como les gallegues, se perdiera ente ella. Nun pudo haber reacción. A les ocho de la tarde los ingleses chocaron escontra el ‘Gijón’ y, anque los elementos dieron dellos minutos de tregua, permaneciendo xuníos los barcos mentres un tiempo ensin dise a pique, nesta ocasión falló la intuición humana: tóo paecía indicar que el barcu que diba correr peor suerte yera el ‘Laxham’, polo que varios tripulantes pasaron a pie del buque inglés al Gijón.  

Foi un erru. Esi día hundiéronse los dos barcos. Resultaron 110 muertos del ‘Gijón’ y seis del ‘Lexham’, anque la cifra esauta de decesos nun se supo hasta muncho dempués: la traxedia, anque enorme, quedó llixeramente aminorgada na memoria de la sociedá de 1884 dempués de que cincuenta y seis pasaxeros a bordo d’un bote salvavides foran rescatáos pol buque ‘Santo Domingo’, otros dieciséis por un buque inglés, trece por un barcu francés y otres diecisiete, finalmente, acabaron nes costes ingleses, auxiliáes como el restu de los supervivientes qu’acabaron en A Coruña o Muros. Menos yera nada.