Pa falar de la etoloxía del poni asturcón cuntamos col magníficu trabayu del biólogu Jorge Jáuregui Campos, qu'a lo llargo de trés años, ente 1992 y 1995, realizó un refechu trabayu de campu estudiando en tientes el so comportamientu, el costumes de los distintos exemplares de la menada, según la territorialidad ente los distintos grupos de la sierra.

En primavera, tres les llargues ivernaes, llega'l momentu nel que s'amonta'l númberu d'exemplares del corru, tomando la dómina de nacencies dende marzu hasta finales de xunetu. Los potrinos empiecen el so desenvolvimientu rápido; dende'l momentu mesmu de la nacencia, nel so primer día, yá son capaces de trotiar, los calostros y la lleche materno van ser el so únicu alimentu los primeros díes, pero l'asturcón nuevu nun va tardar n'alternar la lleche cola campera. Brincos, carreres y engarradielles a manera de xuegos dan a los corros una allegre viralidad. Pero esta allegría puede vese atayada de sópitu. Los llobos, arteros cazadores, acesmen de cutio a los potrinos, peses muncho más algamadices que los adultos. So la protección d'éstos al abelugu de la menada, que se cierra sobre sí énte'l peligru, los ataques non siempres terminen en matanza.

Los sementales nesti tiempu nun dan aguantu, sobremanera si les manaes son grandes, non yá pola necesidá de controlar muncho más a les sos yegües, sinón tamién porque tienen de xixilar a los otros sementales, refugándolos para evitar que-yos quiten dalguna fema.

Al llegar el branu la puxanza primaveral del semental mengua considerablemente. Yá nun permaneces tan abargana de les femes y nun les axunta col mesmu enfotu. Elles ocúpense de les sos críes. Perdayures florien los uzes pintando'l paisaxe de color violeta, y los felechales tán en plenu apoxéu. Para evitar a los tabanes y les cafiantes mosques, les menaes busquen el frescu de los llugares aveseos.

Según va llegando la seronda, apaecen les primeres xelaes y empieza a crecer el pelo que los va protexer del fríu. Ye nesti tiempu cuando se produz unu de los trabayos más importantes: el marcaje. Dellos homes duechos baxos los corros del monte dirixiéndolos escontra dalgún camín angostu, o al interior d'un pescaderu, nel que se pesquen les críes. Como nesta dómina'l pelo ye llargu y bien trupu, tosquílase-yos na zanca y darréu márquense col fierro, amás d'un nome y un chip para asitialos nel rexistru oficial de la raza.

Mientres l'iviernu los asturcones presenten un aspeutu bien distintu al del branu. La llarga pelambre apúrre-yos un bon abrigu. N'ocasiones, cuando hai grandes nevaes, vense impidíos pa atopar vexetación dalguna, atopándose aisllaos mientres díes ensin posibilidá dalguna d'alimentase. Ye entós cuando, para engañar al estómagu, comer ente ellos les clines y les goches de la cola, fechu ésti que forma parte de la lleenda de nuesos ponis.