El plenu anuncia la ellaboración d'un plan director pal caltenimientu y promoción del castru de Mouguías, en Cuaña. L'órganu patrimonial modifica la delimitación de los alredores BIC de les cueves d'arte rupestre La Lluera I y II, n'Uviéu.
El plenu del Conseyu del Patrimoniu Cultural d'Asturies, presidíu pola conseyera Berta Piñán, aprobó güei l'entamu de los trámites para declarar bien d'interés cultural (BIC) la villa romana de La Estaca, allugada nel conceyu de Les Regueres. Amás, l'órganu patrimonial dio'l vistu bonu a la ellaboración d'un plan director pal caltenimientu, l'estudiu y la promoción del xacimientu arqueolóxicu Monte del Castru de Mouguías, en Cuaña.
La Estaca ye un importante testimoniu del pasáu romanu d'Asturies, alcontráu ente los pueblos d’Andayón y La Estaca. El xacimientu correspuéndese con una villa d’época romana, integrada por un edificiu principal de calter residencial, de 700 metros cuadraos de planta, entamáu alredor a dos patios que distribuyíen les habitaciones de la casa de forma radial. Cuntaba, amás, con edificios secundarios pa espacios termales y construcciones agropecuaries.
Alcontróse en 1958, nos trabayos de construcción de la carretera vecina. Naquel momentu, alcontráronse delles parés y estancies, mesmo qu’un mosaicu calteníu na actualidá nel Muséu Arqueolóxicu d'Asturies.
Les primeres investigaciones sobre la villa romana fueron realizaes pol eminente arqueólogu José Manuel González, qu'en 1959 publicó un primer artículu al respective nel boletín de la Comisión de Monumentos d'Asturies. Francisco Jordá y Diego Santos y Juana Bellón realizaron nueves escavaciones, realizaes en 1961 y 1977. En 2018 retomáronse les investigaciones arqueolóxiques, frutu de les que s’atopó un gran mosaicu, n'escelente estáu de caltenimientu, con unes dimensiones de 10,80 x 3,60 metros, amás de pintures murales.
Alredores de les cueves de La Lluera
El plenu del Conseyu de Patrimoniu aprobó tamién entamar el trámite de cambéu de la redolada de protección de les cueves de La Lluera I ya II, allugaes na localidá de Priorio, n'Uviéu, p'adaptalos a lo dispuesto por una sentencia del Tribunal Superior de Xusticia d'Asturies de 2011 qu'alcordó escluyir delles parceles pertenecientes a una cantera. La sentencia foi executada pol Executivu esi mesmu añu, por aciu la correspondiente publicación de la resolución d'execución nel Boletín Oficial del Principáu (Bopa). Agora, para clarificar la situación del ámbitu protexíu, va procedese a la so delimitación precisa, con soporte de cartografía catastral.
Plan director del castru de Mouguías
Finalmente, la Conseyería de Cultura informó sobre la ellaboración, per parte de personal de Patrimoniu Cultural, d'un plan director pal castru de Mouguíass, nel conceyu de Cuaña, que va empezar a executase en 2021 y que plantega actuaciones de llimpieza y acondicionamientu, amás de la regularización y rexistru arqueolóxicu del área escavada, l'estudiu y la restauración de materiales y delles actuaciones de meyora nel entornu y de señalización del xacimientu.
