Nel xunetu de 1877, el nuevu rei Alfonso XII visitó poblaciones como Uviéu, Arnao y Xixón para dexase ver. En toes elles foi recibíu, tantu él como la so hermana Isabel, la Chata’, con suertes dispares.

Foi un viaxe, ensin llugar a duldes, promocional: Alfonso XII llevaba siendo rei malpenes dos años y mediu, y la so madre, tres la Gloriosa del 68, siguía exiliada en París. Ella nun volvería y él sedría un rei curtiu, pero de película. Eso nun lo sabíen entá los asturianos que, en 1877, recibieron con honores al nuevu monarca, entá solteru y llueñe inda de ser ese “triste de ti” del que fala'l cantar popular. Sí del drama que pesaba sobre la so acompañante, la quería Chata’ y so hermana mayor, tan nueva como prematura la so viudez. En fin: dos yogurinos que pasiáronse, talos díes como estos, pola Asturies de fai yá más de cientu cuarenta años.

Tol viaxe nárralu el periódicu alfonsín por excelencia, La ÉpocaGracies a esta publicación, güei digitalizada na hemeroteca de la Biblioteca Nacional d'España (BNE), sabemos que la real pareya d'hermanos llegó a Asturies procedente de Llión, al traviés del puertu Payares y en tren hasta Busdongo y, de nuevu, a partir de Pola L.lena. N'Uviéu abellugáronse nel palaciu de Camposagrado, el de l'Audiencia, n'habitaciones decoraes “con cencellez, como deseyen los regios viaxeros”, pero solo dempués d'asistir a un ‘Te Deum’ na Catedral, acompañaos, nel intre, por Alejandro Mon… pero non l'alcalde de la ciudá, por tracamundiu, según dalgunos; por intención política, según otros.

Espantu municipal

Nun foi l'únicu discutiniu surdíu al redol a la estancia rexia. Pocos amosáríanse contentos colos dos arcos del trunfu asitiaos pol consistoriu como bienvenida al rei y a la so hermana: unu na esquina de la cai de Campomanes, “modelu perfectu de feúra y corrupción de la estética”, según el corresponsal de La ÉpocaFechu de hiedra escura que formaba una “masa informe” d'acordies con esti, cuntaba con “dos tarxetones de blancu llenzu que paecíen lóculos, esos antiguos adornos que s'atopen nes catacumbes romanes. Dientro d'ellos tuviera de zarrase al autor”. Y más: “Ente la colleición de versos que refundiaron les señores al pasu de la xarré real, háilos detestables”. ¡Vaya! El escribiente, eso sí, sí qu'apondera “unes lindísimes poesíes en bable asturianu, lleíes pol so autor a presencia del rei”.

A la fin: n'Uviéu visitaron l'Hospiciu y la La Maletería; la Catedral y la Cámara Santa, la Universidá, onde contemplaron “la rica colleición de camparines ya insectos d'América que contien el gabinete de la hestoria natural” y, a otru día, la fábrica d'armes, “dende onde va colar a Trubia, xintando nesti puntu”. De magar, y ensin parar, a Xixón, a onde al cronista-y gustó más el panorama: los trés arcos yeren, dixo, más bellos; unu “de madera, bien espodáu y ensin otru ornamientu qu'un remate con una pequena figura, en tarxetón, de don Pelayu y les armes del pueblu”; l'otru, fechu de cok y de fierro, asonsañando un arcu góticu; y el terceru, de carbón mineral.

Dende Xixón, visitaríen la fábrica de cinc y la mina d’Arnao, a la qu’aportunaron n'entrar, como yá fixera, más de venti años enantes, la madre de dambos, Isabel II. La diferencia taba en que cuando Isabel visitó Arnao la estensión de la so mina yera de 200 metros; agora, llegaba a los quinientos. De nuevu a Uviéu, onde fueron recibíos con fueos artificiales y un engalanamiento nunca vistu, con lluces allumando al empar “la fábrica de chocolates de Fernández; les cais de la Rosal, Flora, Estrada, Universidá; Porlier, San Juan, Rúa, Platería, Catedral y el Bombé”. Un nun parar. A primer hora de la mañana, la vuelta a la villa de Xovellanos, onde se dieron el primer bañu de la temporada y percorrieron la ciudá a cuerpu, hasta'l faru, onde xubieron; visitaron l'hospital, la Tabacalera y el conventu de les Agustinas y tamién l'Institutu de Xovellanos. Dempués, cena y descansu hasta la partida a Galicia. ¡Duru trabayu, el de ser rei!