Nun partaz del cordal de Carondio, elevóse un tiempos pretéritos un monumentu megalíticu de fuerte poder espiritual. Gracies al so alzáu, el paisaxe quedó modeláu con un ineludible perfil máxicu y la so permanencia al traviés del tiempu sirvió pa verificar el llugar onde comenzaron a fraguase los primeros esbozos y esconsueños de los vieyos asturies.

L'espaciu del dolmen correspondiente a la tumba atópase techáu por un llabancu del que sobre'l so tresporte narra una lleenda llocal foi frutu d'un ser sobrenatural. Dizse qu'una muyer escomanada, una moura a la que los árboles más altos namái-y albondaben les rodiyes, puxó cola tiesta pela cobertoria superior hasta depositala nesta xerra. Mientres, col duviellu na mano, nun dexaba de filar tranquilamente.

Lligáu al so simbolismu funerariu, la cámara sepulcral del dolmen lleva adosada al accesu una pequeña antoxana. La intención yera la d'establecer un umbral de tránsitu ente la lluz de la vida nel esterior y la escuridá de la muerte del interior. Acompañando al fináu nel misteriosu viaxe al Más Allá, yera avezao nesta triba de templos la deposición de diversos oxetos rituales como intencionaes ufriendes mortuories. Del conxuntu de productos atopaos nellos destaquen pola so polivalencia los hachos pulimentaos yá que yeren un viáticu qu'agrupaba les funciones d'arma, instrumentu y símbolu máxicu.

Na llastra de Filadoita nun se tien constancia de nengún tipu d'ufrienda, namái aportó hasta los nuesos díes la cadarma vacía del so armazón de piedra. Pero a pesar de la so desnudez, la so presencia güei día xuxuria decididia hacia los intersticios de la nuesa alma l'harmonía d'aquellos homes y mueyes qu'un día pisaron esta mesma tierra. Una harmonía que nos tresmite los sos sufrimientos y gayoles faciéndonos sentir más reconfortaos y menos güerfanos.