La midida tomóse en coordinación colos conceyos d'Uviéu y Xixón, que tamién van afaer la so ufierta a los nuevos horarios del CTA

Cambeos nos horarios de los búhos d'Asturies. El Consorciu de Tresportes (CTA) va modificar a partir d'esta fin de selmana les frecuencies de los servicios nocherniegos d'autobús. Afaense d'esta manera a les restricciones horaries establecíes al ociu nocherniegu, que nun va poder zarrar más tardes de les 2 de la madrugada. La midida tomóse en coordinación colos conceyos d'Uviéu y Xixón. Dambes ciudaes van afaer los sos servicios nocherniegos a los nuevos horarios del CTA que, con calter xeneral, van rematar ente les 2 y les 3 de la madrugada

Tola información disponible va poder consultase na web del consorciu a partir d'esti vienres. Los cambeos horarios afecten a les llínees ente Uviéu y Xixón, Avilés, Llangréu, Mieres, La Pola Siero, La Fresneda – Llanera, y La Ribera – Morcín – Riosa. Tamién se van ver afectaes les conexones ente Xixón y Avilés, Candás y Lluanco, amás de los autobuses ente Avilés y Les Vegues y Piedrasblancas, y Llangréu y La Pola Llaviana.

Estos servicios especiales, qu'empezaron a emprestase'l 3 de xunetu, son cada vegada más utilizaos y apurren seguridá na movilidá nocherniega nes zones de mayor necesidá. Anguaño dieron serviciu a más de 37.000 persones, a pesar de que s'atayaron el 14 de marzu hasta empiezos de xunetu pola pandemia de la Covid-19.