La Guaxa

La guaxa ye una muyer perfea y perdelgada qu’entra peles peslleres de les puertes pela nueche pa quita-y el sangre a los guah.es pa que nun crezan enxamás. Tamién puede chupa-y el sangre a les muyeres moces. En munches versiones esta muyer tien un únicu diente col que pega un ñascu pa sacar sangre a les sos víctimes, otros dicen que ye una bruxa malvada y otros una curuxa maldita. Pero toes estes versiones tienen una cosa en común: la guaxa tien sede de sangre.

Pesadiellu

Naide conoz l’aspectu del pesadiellu. Nun sabemos cómo ye, pero sabemos cómo actúa: Preséntase peles nueches demientres dormimos, faciendo fuercia escontra’l nuesu cuerpo, presionandolu ya impidiéndonos respirar, lo que fai que les sos víctimes sufran mareos y seyan incapaces de dormir. Dicen algunos que namás rezando puede vencese a esti monstruu misteriosu. Otros, que colos años cambió de nome y anguaño se-y conoz como “ansiedá”.

Pataricu

Non por ser menos conocíu el pataricu da menos mieu. Trátase d’un xigante con un güeyu na frente que vive nun estrañu país que dicíen qu’esistía ente Navia y el ríu Eo. Esti chocante ser tien perdesarrolláu’l sentíu del olfatu, lo que-y ayuda na caza de la so comida favorita: carne humano. Concretamente, la de los náufragos que se perdíen pel ríu, a poder ser crudos, yá que nun conocen el fueu. Non en vano, en dalgunes parte de Navia entá se diz “yes más malu que’l pataricu”.

La güestia

La güestia ye’l ser más representativu de la nueche de les ánimes. Encabeza una terrorífica procesión compuesta poles almes de los muertos más recientes de les aldees, dando vueltes alredor de la casa de quien taba a piques de ser parte d’esa mortífera procesión. Esti alma en pena baxa pelos pueblos d’Asturies, caminando peles viesques al gritu de “Andái de día que la nueche ye mía”, allumándose con unes veles que en realidá son güesos. Dicen que davezu atopaba a dalgún despistáu peles viesques perdíu, y-y daba una vela pa ayudalu. Esta persona al llegar a casa, atopaba que esa vela yera en realidá un güesu y morría dellos díes dempués.