Mapi Quintana Bellón ye una de les referentes de la música asturiana de los últimos años. Anguaño ye miembro del Colectivu Asturianu de Jazz, una asociación fundada nel añu 2011 col propósitu de representar a la puxante escena del jazz asturianu, sirviendo como plataforma para la espresión artística de los músicos de jazz asturianos. Güei responde al nuesu cuestionariu:

Un llugar pa perdese una fin de selmana… 

Empezamos fuerte… ¿Son toes así de fáciles? Zarra los güeyos, pon el deu a voleo enriba el mapa d’Asturies y onde señales va valite.

Un llugar pa vivir…

 Agora mesmo tá Piloña poniéndose mui caliente colos habitantes estelares que tan adquiriendo. Y hasta ahí pueo lleer.

Un platu…

Patates frites con un güivu de pitina llibre

Un postre…

Cuando tomaba lleche de vaca, flipaba cola barreña de Grau con freses.

Una playa pa pasar el día…

La Playa de Vega en Ribeseya

Un pueblín que nun podemos dexar de ver…

Dígovos 3, ún de ca fastera: Brieves (Valdés), Xomezana Riba (L.lena) y Riocaliente (Llanes)

Un chigre pa tomar unos culinos…

Ufff… Escoyer ye perder. Pa culinos, Canteli en Xixón y pa too lo demás, La Naveta en Nava.

Un parque natural pa visitar…

El de mi casa: Les Ubiñes – La Mesa

Una fiesta a la que nun faltar…

La Fiesta La Flor, nel Prau La Flor en Piedracea (L.lena)

Un muséu pa recomendar…

L’ Etnográficu de Porrúa

Un momentu de la hestoria d’Asturies que te prestaría vivir…

Prestaríame que’l mi país fuera una república, así que gustaríame tar nel momentu nel que se declara la Segunda República y la xente tenía la grandísima ilusión de que les coses diben a meyorar. Esi restallíu d’ euforia tuvo que ser mui emocionante, anque unu de los peores episodios d’Asturies y del estau enteru taba por venir.

Un baille pa pasalo bien…

Beil.las jota y gallegada y paezte que corriste La Travesera.

Una pallabra n’asturianu que te preste…

 Échovos dos, que deprendí de ca’ una de les mis güeles: apitaxá (adxetivu, tar apitaxá: tar encoyía de frío o tener frío) y escanalá (adxetivu, andar escanalá: tener mieo)

Una tradición que nun pue perdese…

 Los chigres – tienda. Son como les abeyes. El día que desapaezca l’ últimu chigre – tienda, muerre Asturies.

Una espresión n’asturianu que te preste… 

Tás como un pirru caza