El Principiu d’Igualdá busca que toles persones ensin distinción de raza, sexu, xéneru o clas tengan les mesmes oportunidaes. Anque, anguaño queda bien nidio que la igualdá ente muyeres y homes entá nun ye una realidá, hai munches persones que día tres día trabayen col envís d’algamar un mundu meyor y más xustu.

Un bon casu d’estos trabayos ye’l que fai la Conceyalía d’Igualdá y Feminismu del Ayuntamientu de Mieres, que se cimienta sobre la tresversalidá y, dende esti conceptu, actúa dende delles estayes. Una d’estes estayes ye la Casa de Les Muyeres que tien dos de los pilares fundamentales del trabayu d’esta Conceyalía: l’Axencia d’Igualdá d’Oportunidaes y el Centru Asesor.

Dende l’Axencia d’Igualdá caldía orienten a les muyeres del conceyu na busca d’un güecu nel mundu llaboral. Anguaño, entá hai munches muyeres ensin formación nin conocimientos pa enfrentase a la busca d’emplegu (tales como facer un CV o acudir a una entrevista) a les que l’Axencia-yos ofrez atención personalizada con orientación a tolos niveles. Amás, failo n’estrecha collaboración con otres entidaes enfocaes a colectivos especialmente vulnerables asina como cola Oficina d’Información Xuvenil, l’Axencia de Desarrollu Llocal o Servicios Sociales. Tamién sofita’l movimientu asociativu de muyeres, promueve’l desarrollu de modelos nuevos de rellaciones llaborales o asesora al personal de l’Alministración Llocal.

D’otra banda, el Centru Asesor brinda asesoramientu llegal, información y orientación de forma personalizada y de baldre pa la defensa de tolos drechos de les muyeres. Dende la Casa realícense estremaes acciones: Asesoramientu xurídicu a muyeres en tolos ámbitos del Drechu (de Familia, Penal, Llaboral, Alministrativu), atención integral y asesoramientu especializáu a víctimes de violencies machistes en toles sos formes, siguimientu de les órdenes vixentes nel Conceyu en coordinación colos diferentes cuerpos y fuercies de seguridá, solicitú de xusticia gratuita, reclamaciones, recoyida y tramitación de denuncies por discriminación salarial, siguimientu de procesos xudiciales, asesoramientu en casos de divorcios o separaciones… El Centru Asesor zarró l’añu 2021 con un balance de 871 muyeres atendíes de les que, 182, foron usuaries nueves.

Dende la Conceyalía, dirixida por Nuria Ordóñez, faen especial fincapié na necesidá d’implicación de tola sociedá pa poner frenu a les violencies machistes que caldía afecten a muyeres más moces, puesto que, a la hora d’enfrentase a elles, les víctimes siguen teniendo munches duldes y amuénsense reacies a interponer denuncies.

Con esi enfotu, el d’acabar coles violencies machistes al traviés de la educación, otru de los puntos más importantes del trabayu de la Conceyalía ye la Formación, llegando a los centros educativos, cola educación n’igualdá y diversidá. Esti cursu ufrióse, de manera totalmente gratuita, pa tolos centros educativos del conceyu de Mieres y, per primera vegada, formación dende Educación Infantil a Bachilleratu.

Anque, la cara más visible del trabayu de la Estaya d’Igualdá y Feminismu ye’l que se da nes cais, nes diferentes actividaes que faen a lo llargo dell añu al traviés de charres, talleres, xornaes formatives o les campañes del 8M y del 25N. Busquen averase a la ciudadanía per aciu del arte, la formación y la cultura, amosando la tresversalidá del feminismu ya integrándolu na sociedá. Na campaña próxima del 8 de marzu van tener charres didáctiques y formatives, talleres participativos, teatru, monólogos, esposiciones en 4 espacios, presentaciones, cine…

Pero en Mieres del Camín la rede feminista nun se llimita al fondu trabayu de la Casa de Les Muyeres, sigue texéndose y arriqueciéndose coles diferentes asociaciones y colectivos qu’actúen nel territoriu.

Ente elles atopamos al grupu de muyeres “Les cames sin facer”, que lleva décades participando activamente en delles reivindicaciones de los Drechos Humanos en xeneral y de les muyeres en particular y entamando actividaes como tertulies, meses de discusión o delles xornaes, como rellata Montserrat Garnacho, una de les sos miembres.

Otra d’eses iniciatives ye la “Caravana Kaza Basuras” o lo que ye lo mesmo, Patri y Bea, les emprendedores tres el proyectu, que, al traviés de la reutilización y con un calter interseccional, realicen diferentes actividaes y talleres. Actividaes como la fecha con motivu del 25N na qu’encamentaben a les y los mierenses a cambiar llibros feministes, que sedríen entregaos a la rede de cases d’acoyida pa víctimes de violencia de xéneru, por mensaxes de lluz fechos con llámpares reutilizaes.

Con too, gracies al trabayu fechu dende les instituciones, pero tamién dende l’asociacionismu, el Principiu d’Igualdá ye daqué que, adulces, va tando más cerca de convertise nuna realidá.