Mio güela, una sección na que diverses persones falen de les sos güeles.
Entamamos esta nueva sección, y ye pa min un gran honor que seya con daquién de la mio
familia: La Güela Usté.
Tol mundu m’entruga porqué la llamábemos asina y, cunten les sos ñetes, qu’al falar con ella
y tutiala, ella siempres retrucaba que yá yera mayor, y teníen de tratala d’usté. Al dicilo tanto, yera conocida asina nel pueblu, asina que, la verdá, paezme que pocos conocíen el so verdaderu nome: Carme.
Carme yera alta y bona moza, tramposa nel xuegu, con munchu carácter, el mesmu que-y
fixo llegar a los 94 años fumando hasta los sos díes caberos. Nun llegué a conocela, pues morrió poco primero de ñacer yo, pero la so semeya presidió siempres el salón en casa de mio güelu. Yera la mio bisgüela, madre del mio güelu Vicente Curuxera, un personaxe carismáticu na nuesa familia. Frente a lo semeya, dende neña, les mios tíes siempres me dixeron:
“Yes igual que la Güela Usté”, lo que llevo con arguyu tola vida.
Carme tuvo nada más y nadamenos que catorce fíos, de los que sobrevivieron doce. Inda a día de güei sigo entrugándome cómo pudo ella sola criar asemeyada tropa, pues con 35 años morrió afogáu’l que fuera’l so home y pá de les criatures. Cúntame mio tía y mio ma, que foi
gracies a la caridá de los vecinos del pueblu, y a llevar a dalgún d’ellos a families pa que los criaren.
Aquelles muyeres, como la Güela Usté, fueron y son pa min un exemplu de coraxe, llucha, esfuerciu y trabayu. Va por elles esti pequeñu homenaxe al llabor y la vida que representaron naquellos tiempos nos que la muyer yera apartada y marxinada, siendo sicasí, al mesmu tiempu, la pieza clave de toa una sociedá.
