Mio güela Lupe ye una güela d’espíritu llibre. Siendo bien moza entamó a ser adulta y a encargase de les coses que naquella dómina paecíen corresponder namás qu’a les muyeres.

Nun se m’escaez cuando-y entrugué como yera la vida naquellos tiempos, y con llárimes na cara cuntábame que munches vegaes ye meyor escaecer el pasáu.

Ñació nuna pequeña parroquia rural del conceyu de Samartín del Rei Aurelio. yera fía d’un mineru que trabay´´ó demientres más de 50 años na mina y, siendo la menor de trés hermanos, tuvo la suerte de tener un alma ximielga, una hermana que por desgracia a los pocos años abandonó a la so otra metá, al so espeyu. Pasaron los años y con ellos, la vida de Lupe foi camudando a la mesma velocidá que camudaben les cuenques mineres. Yera como si’l pueblu y mio güela fueren evolucionando y madureciendo al mesmu son. Lo qu’enantes yeren pequeñes parroquies rurales, agora yeren importantes barriaes de trabayadores onde s’axuntaben los homes y muyeres que víen na minería una oportunidá pa meyorar les sos condiciones de vida, costare lo que costare y, en munches ocasiones, el preciu a pagar yera la so propia vida. Enantes de casar con mio güelu Manuel y afincase en Blimea, onde trabayaba como modista, Lupe crió a dos fíes, mio ma y la mio madrina, a la que siempres vio como una fía, ensin facer distinción ente dambes.

Mio güela ye la esencia más viva de les muyeres que viven y vivieron sosteniendo estes cuenques, ye l’exemplu de muyer obrera y comprometida colo suyo, ye la viva imaxe del sacrificiu y del arguyu de sentise parte d’un sitiu, parte d’una comunidá, parte d’una clas social.

Como mio güela hai munches muyeres que tuvieron una vida y hestories paecíes, muyeres que son recordaes como «la vilda de», «la fía de», «la muyer de». Dame muncha pena que pasen a ser recoraes por dalgo asina, nun ye xusto ver como muyeres tan fuertes y con tantu remangu y personalidá nun reciban la reconocencia que de verdá merecen.

Creo que’l tiempu con una güela val oru, y munches vegaes nun somos quien a ver la importancia que tien el pasar una tarde o una mañana colos nuesos vieyos y sentase a falar con ellos. Tenemos que camudar el chip, baxar el ritmu de les nueses vides y esfrutar d’una taza de café o d’unos fayuelos… ¡Ah, por ciertu!, marcho que mio güela tiénme preparáu un bon platu y yá llego tarde.