La hestoria del 25 de mayu de 1808 ye bien famosa, pero daqué menos conocío ye'l papel que tuvo una muyer, María Josefa Francisca González y Suárez, meyor conocida como Marica Andallón. Ye por eso que güei vamos viaxar nel tiempu y conocer la so fazaña.
Bautizada na parroquia uvieína de San Tirso, Marica Andallón foi fía de Pedro José, natural d'Uviéu, y d'Isabel, natural de Mieres. De moza, Marica Andallón trabayó nes tabiernes que tenía'l so padre na cai uvieina de Jesús y na plaza del Fontán. Tuvo una fía de soltera, acoyida nel Real Hospiciu y llamada Isabel Iglesias. Como sirvienta de la familia Sierra salió de la capital asturiana y moró sucesivamente en Madrid, Andalucía, París y Burdeos. De siguío tornó a Uviéu, onde trabayó y vivió nun establecimientu de comestibles allugáu na cai del Rosal, n.º 22. Marica Andallón adquirió notoriedá arriendes de los acontecimientos de mayu de 1808.
El día 9 los maxistraos de la Real Audiencia d'Asturies intentaron afitar el bandu del Conseyu de Castiella que contenía la Orde de día 2 del duque de Berg, dictando severes midíes contra posibles nuevos amotinamientos de la población española. A dichu intentu opúnxose la ensame que nesi momentu yá conocía tanto la rebelión del día 2 en Madrid como la más recién del 5 en Xixón. Ente quien manifestaron la so oposición atopábense diversos diputaos de la Xunta Xeneral, clérigos de la catedral, obreros de la fábrica d'armes, estudiantes de la Universidá, el procurador xeneral y l'alcalde d'Uviéu. Tamién delles muyeres, ente les que destacaron Joaquina Bobela y Marica Andallón reclamaben la retirada del bandu. La primera abandonó Uviéu les cuatro vegaes que les tropes franceses ocuparon la ciudá ente 1809 y 1813. Sicasí, l'actitú de la segunda foi bien distinta. Según paez, contribuyó a evitar el fusilamiento nel Campu de San Francisco de dellos significaos afrancesaos (el 19 de xunetu de 1808). Conocedora de la llingua francesa, collaboró na atención a mancaos y enfermos tantu españoles como franceses, nos hospitales de Santa Clara y San Francisco, y tamién a les nueves acoyíes nel Real Hospiciu. El mesmu xeneral Bonet, comandante en xefe de les fuerces d'ocupación, tuvo a puntu de faer fusilar a un soldáu francés qu'intentara afrellala.
Atendida pola so fía y pola so nieta Felisa, Marica Andallón malvivió na uvieina cai del Mataderu hasta los ochenta y seis años d'edá, pasando la so muerte totalmente inalvertida. Güei, faemos reconocencia de la so valentía.
