Pablo A. Quiroga Prendes, natural de Carreñu, ye cineasta, xestor cultural, y dirixe la productora Algamar Producciones que realiza trabayos en dellos ámbitos culturales, ente los que destaca la so llabor discográfica.
 Ente los trabayos audiovisuales de Pablo A. Quiroga Prendes, nos que la llingua asturiana tien calter vehicular na gran parte d’ellos, brillen los cortometraxes premiaos en distintos festivales: El año de los tres ochos (2001), Aida (2003), Apetito Desesperado (2003), Tres Versiones (2007) y Bisarmes (2009).

Un llugar pa perdese una fin de selmana…

Cangas de Narcea. Un llugar pa tar dos o trés díes y aprovechalos pa conocer un pocoñín más de la so DOP, la viticultura heroica. Si teneis más tiempu y vos pilla un puente, nun ta de más dir a visitar los conceyos vecinos (Ibias, Degaña, Allande..)

Un llugar pa vivir…

Esta ye difícil. A mi prestaríame tener casa en tolos llaos. Poder dir d’una a otra según les époques del añu. Camiento que Xixón ye bona opción si te presta la ciudá y quies tener muncha ufierta cultural y deportiva. Sicasí, anguaño toi en Llanes y encantáu, anque eche en falta un cine.

Un platu…

Va un tiempu, siempres que taba perequí el mio amigu Jose, que ta emigráu en tierres del sur, dibemos a buscar los meyores escalopinos al cabrales.

Un postre…

Taba pensando en facer arroz con llechi un día d’estos.

Una playa pa pasar el día…

La mio playa ye la de Xibares, en Carreño, aunque col pasu del tiempo, y cola capacidá pa moveme d’oriente a occidente podría dicivos una en caún de los conceyos.

Un pueblín que nun podemos dexar de ver…

Caliao, en Casu

Un chigre pa tomar unos culinos…

La Iglesiona en Xixón, El Oventense n’Uviéu, Casa Lin n’ Avilés, La Casona en Llanes,  El Cubano en Candás

Un parque natural pa visitar…

Les Ubiñes. Fascínenme. 

Una fiesta a la que nun faltar…

La nueche celta de Granda en Xixón. 

Un muséu pa recomendar…

El Muséu de la Escuela Rural d’Asturies, en Viñón, Cabranes.

Un momentu de la hestoria d’Asturies que te prestaría vivir…

Quiero más mirar p’alantre y ver esi momentu nel que toes apreciemos y nos sintamos arguyosos de lo que tenemos nesti País.

Un baille pa pasalo bien…

Más qu’un baille diríate un momentu de danza y música como ye’l Conciertu Pola Oficialidá.

Una pallabra n’asturianu que te preste…

Prestar préstenme abondes.  Pero podría dicite un par que dan sentíu al mio mundo: Orbayu y Ocle.

Una tradición que nun pue perdese…

Cuando muerre una d’elles, muerre una parte d’Asturies.

Una espresión n’asturianu que te preste…

“Manquéme”