Nel territoriu de Francia debíu al so procesu hestóricu, nun paez que queden referencies a dalguna santa concreta que se venceye a estos díes del 2 de febreru, por embargu, si ye mui conocía la Fète des chandelles, o La Chandeleur, La Candelaria, que correspuende col ritu cristianu que llamen de la Purificación o Presentación de Cristu nel templu delante de Simeón, un festexu mui curiosu col que la Ilesia sustituyó o adaptó les Lupercales y festexos d’alredor, y que tien como base unos testos bíblicos. Nel so estudiu puede vese como s’escuende un sistema de medida del tiempu pa celebraciones que nada tien que ver con dalgo real, nin humano, como pretende la Ilesia cola imaxen del ser de ficción Xesucristo y el so increíble ñacimientu.

La Candelaria sustituyó a les Lupercales dende la visión de la Purificación, y dizse que fue nel últimu terciu del sieglu 5, por mor del papa Gelasio Primeru, coles procesiones de veles que dicen representar el viaxe de José, María y el ñeñu de Belén a Xerusalén, pa lo que llamen la Presentación, que según dalgunos autores, ya se celebraba en Xerusalén nel sieglu 4.

Los testos bíblicos nos pasaxes que falen d’esti tema, adapten al so gustu y formes lliteraries dalgún vieyu ritual que vien a ser lo mesmo que los festexos de mitá de tiempu ente iviernu y primavera, más tolo qu’hai detrás. Asina, La Candelaria, festéxase 40 díes después de Nadal coincidiendo con toes estes feches por continuar coles vieyes formes de medir los tiempos por mor de la Ilesia católica pero que tien raigaños más vieyos.

Nel refraneru francés, alredor de La Candelaria, queden frases que vienen a ser un continuu coles conocíes n’otros llaos.

À la Chandeleur, l’hiver se meurt ou prend vigueur

Pola Candelaria, l’iviernu muerre o garra fuercia

Rosée à la Chandeleur, l’hiver à sa dernière heure

Rosada pola Candelaria, l’iviernu na so última hora

Si la Chandeleur pleure, l’hiver ne demeure

Si la Candelaria llora, l’iviernu non demora

Chandeleur à ta porte, c’est la fin des feuilles mortes

Candelaria a la puerte, ye la fin de les fueyes muertes

Un detalle importante na celebración de La Chandeleur, ye que ye tradición comer crepes, lo que venceya, de nueves, a lo agrícola, los cereales, la fariña, y los sos productos, a esti tiempu de festexos. N’Asturies hai una tradición mui paecía, que ye facer y comer frixuelos alredor de los díes d’ antroxu.