Pinín ye un popular personaxe asturianu de ficción, protagonista de les viñetes de Telva, Pinón y su sobrino Pinín, mui popular nos años 40, 60 y 70 del sieglu XX.
Foi creáu pol dibuxante Alfonso Iglesias, pa les sos famoses tires del diariu La Nueva España. Nes tires Pinín preséntase como un neñu rubiu, menudu y con boína y n'ocasiones una gaita. Viaxaba por toa Asturies nel madreñogiro. Esti tresporte yera una madreña xigante que tan llueu sirvía de barca como volaba gracies a les hélices de la parte cimera. Les aventures incluyíen n'ocasiones cierta crítica social y distanciamientu de la solemnidá de les publicaciones onde apaecíen. Dende la posguerra goció de gran popularidá ente los asturianos y la so imaxe espublizóse rápido, llegando inclusive n'ocasiones a ser representáu como un símbolu d'identificación asturiana.
Non apaeció namás na prensa escrita, sinón que decoró murales de carreteres, chigres, cartelos de fiestes locales, desfiles, sellos, amarutes d'antroxu, publicidá, etc., en munches ocasiones al pie de los sos «tíos» Telva y Pinón.
Les sos hestories tuvieron tamién adaptaciones al mundu teatral, como na obra Telva y Pinón, o hasta'l cinematográficu con Las aventuras de Pinín y sus amigos, en 1979. La importancia d'esti personaxe foi tan vultable, que nel aeropuertu de Asturies en Ranón atópase unu retruque qu'homenaxa'l so yá míticu "madreñogiro".
