El programa va percorrer los meyores momentos de los trés años de la plataforma de conteníos xuveniles audiovisuales n'asturianu

La canal de conteníos audiovisuales n’asturianu PlayPresta ufre esta nueche un programa especial de más de seis hores de duración pa celebrar la fin del añu y tomar les uves siguiendo les campanaes n'asturianu. La emisión va facese dende les 22:45 hores nes sos canales de Facebook y Youtube.

El programa, presentáu por Arantxa Margolles y Alma Hidalgo, protagonistes de dellos espacios na canal d’audiovisuales, va cuntar cola participación de numberosos collaboradores de la mesma, que van apaecer a lo llargo de la emisión, que repasará los trés años recién fechos de PlayPresta, colos meyores momentos y otros conteníos preparaos a costafecha pa esta nueche.

A les 12 llegarán les uves y dempués más de cinco hores de diversión p’acompañar nes cases nesta Nuechevieya tan particular.

Puedes acceder a les campanaes en www.facebook.com/playpresta