Mieres acueye na Casa de Cultura Teodoro Cuesta «Al horru» una triloxía poética qu'homenaxa a un símbolu tan emblemáticu na nuesa cultura. Esta esposición empezó'l 5 de xineru y va durar hasta'l día 27 del mesmu mes con un horariu de 12:00 a 14:00 y de 17:00 a 21:00.

Nesti proyectu que sirve como homenaxe lliterariu y gráficu al horru, participen 60 poetes y 60 ilustradores. Consta de trés partes y preséntase en trés formatos distintos:

  1. Soporte enmarcáu pa esposición (les tres partes de la triloxía)
  2. Edición numberada n'estuche de madera, una edición por cada tomu.
  3. Edición rústica, formatu llibru, en tres tomos

Gran parte de los poetes y ilustradores son asturianos, el restu son de fora de la nuesa rexón, pero toos ellos con un reconocíu prestíu. Toos ellos apurren la so visión sobro esti iconu asturianu que ye l'horru. La presidenta de l'Asociación d'Escritores d'Asturies, María Esther García López coordinó a los poetes y tradució los poemes de la primera y tercer parte. Los poetes encargaos de la segunda parte, escriben davezu n'asturianu. Los demás artistes fueron coordinaos por Fermín Santos. Cabo mentar tamién qu'esti proyectu cunta cola collaboración de César Ripoll y Aurelio González Ovies.