Si hai una zona qu'ensin dulda estos díes gústanos visitar ye la sablera. Ye la dómina perfecta pa esfrutar (cuando'l tiempu mos dexa) de tomar el sol baltaos nel sable, un relaxante bañu, o xugar saltando les refrescantes foles colos nuesos amigos, xusto enantes de tomanos un xeláu. Y si hai una sablera que munchos asturianos y turistes de fuera del país y delles partes del mundu visiten esa ye la de Rodiles.

Y ye qu'esta sablera del conceyu de Villaviciosa ye, ensin dulda, una de les más populares de toa Asturies. La sablera estiéndese a lo llargo d'un kilómetru de llargor y 300 metros d'anchor al oriente de la desaguada de la Ría de Villaviciosa. Nel so estremu occidental comunicase cola Sablera de Misiegu, una sablera más pequeña y con agües más seles que les de Rodiles.

Esta sablera de sable finu y tostao resulta un enclave privilexáu pa tou tipu de deportes marítimos: sobretou pa la pesca y pal surf. Ello ye que nel mundu del surf Rodiles ye bien conocíu pela zona conocida como «la barra», na que se produz una fola considerada ente les cuatro meyores foles d'Europa.

Amás Rodiles cuenta con unes vistes que dexen esteláu a tol que la visita: un amiestu relaxante y maraviyosa de paisaxe de sablera y monte, xuntu con un miradoriu de páxaros, el soníu del mar, y les vistes de la tamién preciosa sablera d'El Puntal dende'l so paséu marítimu de madera pel marxe de la ría faen d'ella una sablera arrogante, parte de la Reserva Natural Parcial de la Ría de Villaviciosa.