Una ruta fácil y d'estraordinaria guapura conduznos al Llagu Ubales, asitiáu nel conceyu de Casu. A esti puede aportase tanto por Asturies y tamién per Llión partiendo de les cercaníes del puertu de San Isidro. Ta asitiáu enriba del Parque Natural de Redes, Reserva de la Biosfera.

Per tierres asturianes puede llegase a él al traviés d'empinaos caminos partiendo de los pueblos de Caliao, La Felguerina o Bezanes. Pa ello hai qu'emplegar delles hores na fuerte xubida. Anque per La Felguerina y La Infiesta ye al traviés d'una vieya calzada romana, agora pista pa touterréns, que puede resultar daqué más suave.

Dende la parte llionesa de San Isidro tómase una pista touterrén a un kilómetru de la estación iverniza, nuna curva xuntu a la ponte que traviesa'l ríu Los Fornos antes de llegar al pueblu de Isoba. Esti camín va llevanos cómodamente, nuna hora, hasta la Collada Acebal, llende de tierres ástures y lleoneses. La pista, ancha y d'unos cuatro kilómetros de llargor, ye conocida col nome de Wamba. Paez ser que foi una antigua vía militar romana o medieval de penetración n'Asturies.

Na Collada Acebal, vamos tener al este, la peña del Vientu. Al sureste, La Rapaína. Nel oeste, los puertos de Contorgán. Escontra suroeste'l Picu Valmartín, y más alloñáu, el cimeru Picu Torres. Pel norte álzase'l Picu Cascayón (o Fornón). Y embaxo al noroeste la mayada y cueva de Valdebezón, y el monte de Redes y la vega de Brañagallones. Nesta collada hai un abellugu de cazadores o guardes.

Para llegar a les veres del Llagu Ubales puede garrase'l senderu que parte del citáu abellugu de caza. Bordiando'l Cascayón, llévanos nun cuartu d'hora a un collaín, dende'l que se ve perbién el monte de Redes. Dende él toma un senderu que baxa a la izquierda hasta'l mesmu llagu, bordiando por un pedreru l'aguada nordés del citáu Cascayón. Nuna media hora llégase a la vera del Ubales, con ciertu precuru al arrodiar el picu poles piedres sueltes.

Esti llagu en dómina braniza nun suel tener muncha agua y pel hibiernu puede tar totalmente conxeláu y cubiertu de nieve. En primavera o dómina de lluvies sí puede llegar a los casi cuatro metros de fondura y a unos doscientos metros de llargu. En la oriella norte hai un mástil portador d'una cruz y un buzón montañeru.

Esti llagu ye frecuentáu al atapecer y al alborecer polos robecos y en dómines de migraciones polos coríos selvaxes. Nun son rares na so redolada les buelgues de llobos, foinos y mustélidos. Embaxo nel monte son bien numberosos los venaos, corzos y xabalíes. Y en los cielos esnalen con frecuencia les figures de les aves rapaces, águiles y utres.

Si namás queremos contemplar el llagu dende lo alto del monte, podemos tomar cualesquier de los senderos ascendentes que dende l'abellugu de caza de la Collada Acebal, llévennos al visu o del Picu Cascayón.

El regresu puede efectuase selemente pol mesmu camín de la ida o facer llargues travesíes polos puertos de Contorgán y desfiladeru de Los Arrudos hasta Caliao. O bien a La Felguerina pela pista o pel monte de Redes, en dirección a la vega de Brañagallones.