Los Picos d’Europa guarden ente los sos cumes, picos y montes cientos de caminos con hestories escondíes pol pasu del tiempu. Sicasí, güei, nun día tan especial como San Valentín, traémosvos una ruta romántica hasta'l Mirador d’Ordiales, onde vas poder contemplar unes maraviyoses vistas d'unu de los llugares más guapos del oriente d'Asturies, pero tamién conocer llugares como'l Pozu del Alemán, onde Roberto Frasinnelli, «l'alemán de Corao», namoráu d'esta zona, bañábase.
La ruta empieza en Pandecarmen y cuando llevamos andaos, aprosimao, unos 350 metros, atopamos el famosu Pozu del Alemán. Ye un pequenu pozu que tien trés o cuatro metros de diámetru y unu de fondura, y a finales de branu sigue llenu d'un agua fresco y cristalino. Un kilómetru dempués vamos tar na mayada de Vega la Piedra, asitiada a unos 1.120 metros d'altitú. Nel kilómetru 7 de la nuesa ruta, dempués de pasar ente les distintes mayaes, atopamos col refuxu de Vegarredonda, asitiáu a una altitú de 1.470 metros, y unos 3 kilómetros más p'alantre topamos el famosu refuxu d'Ordiales, bien próximu yá a la fin de la nuesa ruta.
A los pocos metros atopámons nel Mirador de Ordiales, onde remata la ruta. Ye famosu por tar ellí soterraos los restos de don Pedro Pidal y Bernaldo de Quirós, marqués de Villaviciosa d'Asturies, qu'amás d'escalador foi l'impulsor del actual Parque Nacional de los Picos d'Europa.
