La zona centra d'Asturies escuende numberosos requexos nos que perdese y escapar de la rutina

N'Asturies tenemos la suerte de poder facer munchos planes al llau de casa. La zona central d'Asturies escuende numberosos requexos nos que perdese y escapar de la rutina. Un bon exemplu tenémoslu na ruta de les Reliquies, nos conceyos de Morcin y La Ribera. Entamamos la xornada faciendo una ruta andariega bastante asequible anque un pocu pindia, la ruta a les capielles del Monsacro. Ye una ruta señalizada qu’anque pue facese por trés puntos distintos, nós vamos facela dende’l pueblín de La Collá, nel conceyu Morcin, onde podemos aparcar y siguiendo la carretera a pocos metros veremos el primer cartelu de madera hacia les capielles.

La ruta tien una distancia d’unos 5,3 quilómetros, polo que nunes dos hores y media llegaríemos a la Vega Mayáu, fin del Camín pel momentu. Lo mesmo pa la vuelta, magar qu’hai qu’añadir qu’al tratase d’un camín pindiu la baxada lóxicamente sedrá más rápida, en malapenes dos hores. A lo llargo’l camín vamos atravesar un castañéu, pasu ente pasu’l valle va abriéndose hasta ver vistes d’Uviéu, la sierra l’Aramo o hasta la costa, anque eso namás en díes soleyeros. Cuando llevemos malapenes 1,5 quilómetros vamos atopar una formación rocosa que paez colgar del camín, llamada la Siella del Obispu, onde cuenta la lleenda que l’Obispu Santo Toribiu se sentó a descansar cuando xubía les santes reliquies procedentes de Xerusalén, tres ser esta invadida polos Pereas nel añu 614, faciendo un percorríu pel norte d'Africa pa protexeles y a la fin escondeles nel Monsacro nel añu 705, viaxando dende Toledo énte la invasión musulmana de la península ibérica.

Ruta de las Reliquias

Un paséu con vistes

Cola presencia de les reliquies esti llugar convirtióse en destín de pelegrinaxe pol so misticismu. De fechu, nel Monsacro o monte sagráu, la hestoria ta fuertemente entremecida cola lleenda, onde diferentes autores aseguren que n’époques prehestoriques foi llugar de cultu con presencia de dólmenes onde los pueblos celtes qu’habitaben la zona enterraben a los muertos, yá que-y otorgaben un calter máxicu. Dos sieglos dempués, el Rei Alfonsu II El Castu construyó una capiella nel so Palaciu d’Uviéu a onde mandó treslladar l’arca santa coles reliquies. Esta construcción conozse güei como la Cámara Santa y ta apegada a la Catedral.

Cuando lleguemos a la Vega Mayáu, amás de prestoses vistes al banzáu de Los Alfilorios, atoparemos cola primer capiella, la Madalena. Separtaes pol prau del Ermitañu tenemos la segunda capiella o de Santiagu. Dambes son d’época baxomedieval pero recientemente restauraes, tan declaraes Monumentu Hestóricu Artísticu. Dientro la segunda ermita o Santiagu, vamos atopar el pozu dolménicu de Santu Toribiu, baxo un altar onde los pelegrinos dempués de visitar Uviéu nel so camin a Santiagu estrayíen tierra, yá que-y atribuyíen propiedaes curatives y aprovechaben pa recoyer “cardos milagrosos", un cardu azul que crez abondantemente nesti macizu. Si queremos xubir hasta’l Picu Monsacro (1.050 m), el camín sigue marcáu coles característiques rayes de senderu homologáu tres la capiella de Santiagu. Dende equí nun mos llevará más de 20 minutos llegar al cume.

Patrimonio histórico

Al tratase d’una ruta curtia, si mos queden enerxíes podemos acercanos hasta’l conceyu vecín de Morcín pa conocer el famosu Torreón de Peñerúes, consideráu Monumentu Hestóricu orixinariu de l’Alta Edá Media, alredor del sieglu XII. Al formar parte de la conocida Ruta de les Reliquies paez que la so función yera defensiva pa protexer esta vía d’accesu al centru d’Asturies. Hasta fai pocos años taba allumáu polo que podía contemplase a bastante distancia dende la carretera. La xubida al Torreón nun mos llevará más de 20 minutos per un camín pindiu pero cómodu. Podemos dexar el coche nel aparcaderu del pueblu, frente al monumentu al montañeru. Amás, el camín de xubida sal xusto al llau de la escultura. Dende arriba podemos contemplar guapes vistes de la sierra del Aramo, con cumes como la mítica Mostayal frente a nós o’l propiu Monsacro.

Podemos finalizar la xornada andariega cambiando al conceyu de La Ribera, onde en 10 minutos escasos llegaremos al prestosu pueblín de Güeñu, unu de los pueblos con mayor númberu d’horros y paneres d’Asturies, prácticamente toos en bon estáu o restauraos, dalgo non tan fácil de ver güei. Nesti pueblín atópase tamién el Centru d’interpretación del horru. Paga la pena conocelu y descubrir les curiosidades y tipos d’esti símbolu arquitectónicu de la nuesa cultura. Si lleves neños ye una oportunidá única pa que deprendan les partes del horru xugando y construyendo unu cola ayuda y supervisión del personal del centru.

Vero encamienta: ¡Llevái agua! La ruta les capielles nun dispón de fontes pel camín, polo que vos recomiendo dir provistos d’agua, amás de comida y calzáu afayadizo.

Güeñu, unu de los pueblos con más horros d'Asturies.