Les tradiciones asturianes faen referencia al saludador como una persona con poderes curativos y rasgos definios. Asina según Constantino Cabal (La Mitologia Asturiana, 1972) los nacíos en Vienres Santu, a les tres de la tarde, que baxo la llingua lleven una cruz o, si carez d’ella, la imaxe de la rueda del sufrimientu de Santa Catalina, sedríen los rasgos que definiríen a un saludador. Tamién son susceptibles de ser saludadores el sétimu de los fíos o’l que cuntara con un hermanu ximielgu.
Ente les sos capacidaes atópense la de sostener fierros en caldia y pisar brases de carbón ensin quemase. Esti personaxe cuasi mitolóxicu cura al traviés del aliendu, aplicando la saliva o pente medies d’un recital de fórmules, enfermedaes como la rabia, en tou tipu de seres vivos. Hai que destacar que cobra polos sos servicios. La profesión de saludador nun taba prohibida pola inquisición, pero sábese, según Aurelio de Llano (Del folklore asturiano: mitos supersticiones, costumes, 1972) que los obispos y el Santu Tribunal esaminaben a estos personaxes, prohibiéndo-yos l’exerciciu de la so profesión si esistíen nicios de falsedá o engañu.
Paeznos curioso destacar qu’equí n’Asturies amás de los métodos preventivos los saludadores recomendaben que toa persona mordío por un perru pa evitar la rabia tenía qu’atravesar un ríu o regueru enantes que lo ficiere la bestia, recitando per trés vegaes esta oración.
Sabemos que los saludadores teníen unes tarifes bastante significatives viendo’l contestu de la época, nun tenemos la información de la cantidá que cobraben n’Asturies, pero sí sabemos, por exemplu, que les cuentes de Salvatierra (Araba) relatives a los años 1578-79 documenten la intervención del saludador Martín Sáez de Otaza demientres dellos díes, «porque habían andado en esta villa ciertos perros rabiosos», a cambiu de lo que recibió trés ducados.
