12 temporaes n'ACB (Máxima categoría del baloncestu estatal) con más de 300 partíos y dalguna participación cola Selección Española Absoluta.

Saúl Blanco González (16 de mayu de 1985) ‘Mirlo Blanco’ ye de sobra conocíu nel baloncestu estatal y principalmente, nel asturianu. El aleru/escolta tien una estensa trayectoria deportiva por toles categoríes profesionales desque saliera de la cantera del Colexu École d'Uviéu.

Trayectoria y llogros

Con namás que 18 años, xuega en Calefacciones Farho Gijón Baloncesto de LEB (2003). Tres dos escelentes temporaes, llega a l'ACB fichando pol Baloncesto Fuenlabrada en 2005. Ellí permanez cuatro temporaes. La primer amuesa de la calidá de Saúl Blanco na máxima lliga foi n'el Showtime ACB quedando segundu nel concursu de mates. Tres delles temporaes demostrando la so calidá, esplota na 2008/2009 nel Fuenlabrada, rexistrando dos nominaciones como Xugador de la Xornada ACB (click equí).

El trabayu que realizó mientres eses temporaes fixeron que'l seleccionador Sergio Scariolo convocáralu como convidáu na concentración d'España de cara al Eurobasket de Polonia 2009. En 2010 ye incluyíu na llista de 24 xugadores pa la disputa del Campeonatu del Mundu de Turquía. Sicasí, finalmente nun pasa la corte y nun allega a la cita. Coincidir en posición con figures como Juan Carlos Navarro, Sergio Llull o Rudy Fernández complicaron la so entrada definitiva na selección.

Darréu tamién pasó poles files d'equipos como Unicaja Málaga, CB Canarias y Real Betis na meyor lliga d'Europa.

En superando una grave mancadura, na campaña 2017-18 incorporase al CB Prat en LEB Oro (segunda categoría del baloncestu nacional). El siguiente exerciciu Saúl Blanco ‘tornó al llar’ de la mano del Círculo Gijón de LEB Plata onde va xugar hasta la pasada temporada. Probó suerte en Francia, xugando na segunda categoría col Greis Oberhoffen (click aquí). Esti añu, ‘Mirlo Blanco’ tornó al so Uviéu natal de la mano del Oviedo Club Baloncesto de LEB Oru.

Amás, na so estensa trayectoria profesional destaquen les internacionalidaes coles selecciones españoles U16 y U20. Mientres estes consiguió la medaya de Bronce nel Européu U16 de Riga (Letonia) nel añu 2001. Los sos records absolutos na Lliga ACB son de 25 puntos, 13 rebotes, 6 asistencies, 6 recuperaciones, 6 triples, 2 tapones y 40 de valoración en 2014.