Los díes 13, 14 y 15 de payares, el Muséu del Xurásicu d'Asturies (MUJA) celebra virtualmente la XX Selmana de la ciencia online con actividaes gratuites para tolos públicos.
Vienres 13 de payares, a les 17:00 hores. Constrúi una brúxula:
Nesti taller online el públicu familiar va poder construyir una brúxula, conocer los sos oríxenes, aprender cómo funciona y usala. Va durar aprosimao 30-45 minutos, pola plataforma gratuita Zoom. Places: 20
Sábadu 14 de payares, a les 17:00 hores. Globu-cohete:
Creación d'un globu-cohete mientres los asistentes conocen la Tercer Llei de Newton sobre acción y reacción. Va tener la mesma duración que l'actividá del vienres 13 y les mesmes places disponibles.
Domingu 15 de payares, a les 12:30 hores. Visita a llaboratorios y litotecas:
Laura Piñuela, xeóloga del equipu científicu del Muséu, va guiar una visita en directu a los llaboratorios y litotecas del MUJA. Tres el percorríu per estos espacios nos que l'equipu científicu desenvuelve'l so trabayu, el públicu va poder face-y entrugues. Esta actividá, con places limitaes, ta orientada a tol públicu, especialmente públicu adultu. Va tener una duración d'aprosimao 30-45 minutos.
Pa les actividaes del vienres y sábadu va ser necesariu retirar invitación al traviés de la web del MUJA onde tamién se puede consultar el material necesariu pa desenvolveles. Tamién va podese consultar l'enllaz pa la visita virtual del domingu y demás detalles d'interés acerca del eventu (click equí)
