Na llocalidá sierense de Valdesotu celébrase cada añu la representación tradicional de los Sidros y comedies, daqué que se fai cada 10 de xineru nel campu la ilesia. Estos sidros son los tradicionales guirrios o guirries que recuperen l’espíritu del Antroxu asturianu y de les tradicionales celebraciones de mazcares d’iviernu. Los homes oveya, con mázcares coloraes blincando peles caleyes faen sonar los cencerros, mientres qu’acompañen a La Comedia, daqué que consiste nuna representación sarcástica de teatru popular críticu y burlón colo qu’asocede nel llugar.

Antaño, esta celebración estendíase por delles de les parroquies asturianes, como nes de los conceyos de Llaviana, Llangréu o Samartín del Rei Aurelio, dalgo que foi perdiéndose nel tiempu. Estos yeren mui asemeyaos a los de Valdesotu, anque con cambios na temática argumental. D’estos últimos llugares, alcontráronse comedies escrites por Angel González, “El Maestrín”, d’El Condáu en Llaviana o por Felipín de Vallina o Graciano Vallina, vecinos de Sotrondio.

El caltenimientu d’esta fiesta venceyada al añu nuevu y al iviernu ye gracies a los folcloristes que, nos entamos del sieglu XX, interesáronse poles xeres culturales tradicionales, que yá amosaben signos d’esgotamientu, polo que decidieron puxar por calteneles. Sicasí, anque antaño llegábase a celebrar hasta n’Uviéu, agora queda reducío a Valdesotu y pocos sitios más de la contorna asturiana.