El próximu 31 d’ochobre ye la nueche d’ánimes, la viéspera de Tolos Santos, onde ye tradición cellebrar Samaín, esa cellebración tan popular nos Estaos Xuníos (Halloween), pero que tien un orixe celta. 

L’Ayuntamientu de Llanera ta acabante d’anunciar que va facer delles actividaes temátiques esi mesmu día, que son les que darréu vamos cuntar:

  • Inmersión nuna hestoria desconocía nun llugar desconocíu. Asina se llama la primer actividá que planteguen dende la Casa Conceyu. Pa da-y más curiosidá, espliquen que “nun vamos a cuntate nada, nun vamos dicite ónde vas dir... nun insistas, nun lo quieras saber... nun te lo vamos dicir. Solo necesites saber que vas viaxar en bus, tu elixes la parada pero non el destín.” La recoyida ye a les 20:00 y a les 21:30 hores, con paraes en Posada de Llanera y Llugo de Llanera, y va durar sobre una hora y media. Amás, les persones que quieran dir cunten con serviciu de conciliación dende les 19:30 hasta les 21:30 hores. 
  • Nueche d’ánimes mitolóxica nel espaciu escénicu Plaza La Habana. Esta ye la segunda actividá, empobinada a la xente más mozo, de 3 a 12 años, y que va tener una duración al rodiu d’una hora. La entrada de menores ensin adultu (con monitores nel interior) ye a les 19:30 hores. 

Si tas interesáu nesta xera, les inscripciones son de baldre hasta completar places. Namás hai que contactar al traviés del 98577305 o pel corréu oij@llanera.es L’usu del mázcaru ye obligatoriu en tou momentu.

¿Atréveste a pasar una nueche de mieu en Llanera?