Asturies tien unu de los folclores más antiguos y ricos de la península. El so folclore ye bien variáu según na zona na que te atopes. Nesti artículu amosémosvos 4 de los bailles tradicionales más comunes.

El Corri-Corri

El Corri-Corri ye un baille ancestral típicu del conceyu de Cabrales, distintu a cualesquier otru. Ye un baille de cortexu nel que l'únicu home que participa, intenta llamar l'atención de les muyeres. Nesti baille participen ente 5 y 8 muyeres. L'home da palmes, salta y da vueltes intentando llamar l'atención de les muyeres ente que elles, con un ramu de lloréu na mano, baillen averándose y alloñándose a él. Les muyeres escapen del home pero cuando ésti allóñase o paez que rinde, tornen sobre los sos pasos y vuelven escontra él. Cabe destacar que dende l'añu 2019, ta declaráu como Bien d'Interés Cultural (BIC).

Fuente: canal esCabrales

El Pericote

El pericote ye una seña d'identidá del folclore de Llanes. El so orixe remóntase a los sieglos XVI y XVII. Mientres dellos años creáronse distintes variantes d'esti baille según la zona na que se representara. El so nome provien de la localidá de Cué, onde los "pericos" que yeren les muyeres vistíes d'homes, realizaben esti baille. Na actualidá, represéntase'l Pericote antiguu (casi puramente nes fiestes de La Guía) y el Pericote (que suel representase na gran mayoría de les fiestes del conceyu). Fórmase por 4 grupos formaos por dos muyeres y un home cada un acompañaos de gaita y tambor o voz. El Pericote tien tamién calter de baille de cortexu, al igual qu'el Corri-Corri.

Fuente: Bernardino Prieto

El xiringüelu de Naves

El xiringüelu de Naves ye un baille característicu del oriente d'Asturies. Fórmase por 4 muyeres y un home. Esti baille puede estremase en dos partes, na primera d'elles l'home bailla en xunto coles cuatro muyeres. Na segunda, l'home va sacando una a una les cuatro muyeres y con caúna d'elles bailla d'una forma distinta. A la fin del baille, vuelven baillar toos al empar. Originalmente, representábase con cuatro pareyes pero'l primer añu que se bailló en Naves, nun había suficientes mozos y namás bailló unu. Al públicu gustó-y esta nueva estructura del baille que se caltien a día de güei.

Fuente: RBC

Jotas

N'Asturies hai un gran númberu de variaciones d'esti baille según la zona na temos. Podemos atopar por casu la Jota Asturiana, Jota de Cadavedo, Jota del Cuera, Jota de L.leitariegos, Jota de Boal o Jota de Cangas, ente munches otres. Báillase en pareyes y acompáñense de normal de gaita y tambor y en delles d'elles inclusive castañueles o panderos. Amás, caúna d'estes jotas suel tener un cantar distintu pa cada variante.

Jota de Boal, Fuente: Ana María Fanjul