Tornen les visites guiaes de XixónTours pa convdar a la xente de Xixón, Asturies y del mundu en xeneral a conocer la nuesa ciudá y les hestories qu’esta escuende. Esos fechos hestóricos xunto a les que pasamos tolos díes ensin danos cuenta. Esti añu les rutes céntrense nos requexos de la ciudá que vivieron hestories interesantes relacionaes con Gaspar Melchor de Xovellanos, cuando tamos a poques del 210u cabudañu del ilustráu. Pero él nun va ser l’únicu protagonista d’esta visita guiada, Xosefa Xovellanos, una figura importantísima de la vida y la lliteratura asturiana, va desempeñar un papel importante del rellatu que la xente podrá esfrutar nesti tour. 

La ruta ta diseñada pol hestoriador y espertu en Xovellanos Pablo Vázquez Otero, que s’estrena nesti proyectu con XixónTours. Nella, pronpónnos un percorríu peles cais de Cimavilla y otros llugares pa conocer la vida, obra y legáu de los Xovellanos. Un viaxe pela dómina de la ilustración en Xixón realizáu n’asturianu.

Les feches dispuestes pa estes rutes son el 25 de xunu, y el 2 y 9 de xunetu. La duración sedrá d’alredor d'una hora y media, de 20:00 a 21:30. Les tarifes van ser de 10 euros pa mayores de 18 años, 8 euros pa mocedá (ente 13 y 18 años) y va tar disponible de bladre pa reciella d'hasta 12 años. El pagu realízase minutos enantes del tour. Cualesquier persona interesada puede inscribise a través de so páxina web. 

Por supuestu, XixónTours cumple con tolos requisitos de seguranza necesarios por mor de la COVID-19, con un máximu de 25 persones por grupu, respetando la distancia de 1’5 metros, y l’usu obligatoriu del mázcaru.

XixónTours ye una iniciativa organizada pola plataforma VerAsturies.com y Cuatro Gotes Producciones pa dar a conocer la ciudá de Xixón a los propios habitantes del conceyu y a los asturianos y asturianes en xeneral, asina como a cualesquier persona que viniendo d’otros llugares quieran averase a conocer distintos aspectos de la mesma sintiendo la visita n’asturianu. Son rutes diseñaes pa buscar un averamientu orixinal a la hestoria de la ciudá, tratando de da-y un enfoque diferente que llame l’atención del públicu xeneral y n’especial de los y les xixoneses, que yá conociendo los llugares que van visitar, pa que puedan ver aspectos estremaos o desconocíos pa ellos. Les rutes cunten col sofitu del Conceyu de Xixón y la collaboración de Xixonaldia.com.