Sol términu zarzuela asturiana pueden considerase aquelles obres de teatru líticu con partes cantaes y falaes, inspiraes en motivos rexonales – tanto na música como nel tema y argumentu – , y compuestes por autores asturianos o foranos. Como precedente, podría citase la zarzuela en dos xornaes de Sebastián Durón, Salva encantada de Amor, col Bayle del Órgano y fin de fiesta, representáu a la fin de la segunda xornada de la zarzuela. Los personaxes del baille, d'ambiente asturiano, son cuatro dames, un fabricante d'órganos y un home. Hai una gaita nel baille, que sirve pa concluyir tola obra, con un estribillu ¡Ay, cómo suena la gaita de Oviedo!
Primero que'l Nacionalismu musical fixera la so apaición, casi nun quepe falar d'un xéneru zarzuelístico asturianu de verdadera entidá. Hai exemplos aisllaos, munchos d'ellos perdíos, y nun hai compositores asturianos que se dedicaren con exclusividad a la zarzuela. Dende mediaos del XIX hai compositores como José Argüelles, autor de La bruja, zarzuela cómica con llibretu de José Indalecio de Casu, estrenada n’Uviéu ente 1850 y 1852; o Alejandro Jove y Puerta, que compunxo dos zarzueles, de títulu y temática desconocida. Otru exemplu aislláu ye'l del escritor de Pola de Siero Sandalio Sánchez, qu'en 1861 redactó y unvió a Francisco Asenjo Barbieri un loibreto para xuna proxectada zarzuela en trés actos, titulada La rebelión de los moriscos. Con esti oxetu, caltuvo correspondencia con Barbieri dende'l 12 de setiembre hasta'l 26 d'avientu de 1861, ensin que la música aportara a compuesta.
Ente les primeres zarzueles asturianes, ye preciso citar El Rapacín de Candás, con música del catalán Gabriel Balart y llibretu de Francisco García Cuevas; y Una romería en Mieres, Zarzuela en un acto en verso bable (La Habana: Imprenta y Papelería de El Correo Militar, 1879), con música del gallegu Felisindo Rego y llibretu de Sergio García y Echevarría, estrenada nel Teatru Tacón de L'Habana, el 7 de setiembre de 1879. Una plena dedicación al xéneru puede atopase en Osmundo Barredo Gutiérrez (1880-1931), que desenvolvió la so carrera na Arxentina, y ye autor de delles zarzueles d'orientación señardosa y rexonalista, dalgunes d'elles con llibretu del so hermanu Aureliano, ente les que destaquen La nieta de Pinín, De Asturias a Madrid, Ilusiones, La fiesta de Villa Cogollu, Media hora en Asturias, Al son de la gaita, El Alma de Asturias y La chica del barrio.
