Asociación Feminista de Asturies
Nel añu 1976 dióse a conocer l’Asociación Feminista d’Asturies formada por moces estudiantes y colos estudios recién remataos col envís de reflexonar y facer analís de los sos problemes pola so condición de muyer. Esta asociación foi pionera n’Asturies y yera la asociación referente del feminismu y en defensa de los sos drechos. Anguaño, el colectivu sigue puxando polos derechos y la igualdá de la muyer, con delles actividaes, formaciones y movilizaciones a lo llargo del añu, porque anque la igualdá seya cada vez más cercana, tovía nun ye una realidá.
Coleutivu Milenta voces y Muyeres
Ye un colectivu de muyeres que tien como fin últimu tresformar los ámbitos sociales, educativos y profesionales nos que tienen presencia los sos integrantes, de cuenta que esos ámbitos cooperen colectivamente nos sos oxetivos y funcionamientu, xuntu cola Asociación, escontra la consecución d'una sociedá mundial igualitaria, xusta y solidaria. Pa llogralo, tienen como misión xestionar la conocencia de les integrantes, pa empobinalo y ponelo al serviciu de la igualdá de los países, les comunidaes y les persones que más sufren la inxusticia y el desigual repartu de la riqueza y el poder, sía nel Norte o nel Sur.
Asociación Feminista Mujeres Jóvenes de Asturies
Ye una Asociación Feminista ensin ánimu d'arriquecimientu, constituyida por muyeres nueves pertenecientes al Principáu d'Asturies, que comparten indignación poles desigualdaes y violencies que sufren les muyeres nel mundu pol simple fechu de nacer muyeres. Énte ello, respuenden de forma activa y entamada pa combatir el machismu y el sistema patriarcal que prime y poner el so granín d'arena pal necesariu tresformamientu social. Empezaron la so actividá como Asociación en 1986 y constituyéronse legalmente en 1988. Mientres estos años les actividaes fueron múltiples y empobinaes fundamentalmente a la consecución de la igualdá efectiva ente muyeres y homes y a l'ayuda y asesoramientu del colectivu de muyeres nueves. Lluchen viviegamente contra les discriminaciones sexuales, pola visibilización de les muyeres y por impulsar el papel de la muyer, en concretu'l de la muyer nueva onde se da la doble discriminación, por ser muyer y por ser nueva.
Rapiegas
Rapiegas ye un grupu de muyeres asturianes xuníes col propósitu d'esponer, aguantar ya intentar superar los problemes qu'atañen a la muyer y, a última hora, a tola sociedá por cuenta de la opresión que sufrimos. Xustifiquen que'l feminismu busca el raigañu d'esta opresión, pos nun se concibe un movimientu políticu que nun analice y darréu dirixa la so actuación escontra les bases -raigaños- de la opresión contra la que llucha. Entendien qu'esta opresión anicia anguaño en dos realidaes distintes, pero en perfecta simbiosis: el patriarcáu y el capitalismu, siendo esta la razón que nos da'l calificativu de “radical”.